Шавкат Мирзиёев ва Тошкентга расмий ташриф билан келган Беларусь президенти Александр Лукашенко 7 февраль куни пойтахтдаги Humo Arena муз саройида бўлиб ўтган норасмий хоккей учрашувига борди, деб хабар бермоқда БEЛТА агентлиги ва Telegram`даги «Пул Первого» канали.
Беларусь президентини аэропортда бош вазир Абдулла Арипов, ташқи ишлар вазири Бахтиёр Саидов, Тошкент шаҳри ҳокими вазифасини бажарувчи Шавкат Умурзоқов ва бир кун аввал мамлакатга етиб келган Беларусь ташқи ишлар вазири Сергей Алейник кутиб олган.
Шавкат Мирзиёев ва Александр Лукашенко хоккей бўйича Қозоғистон очиқ чемпионати доирасида бўлиб ўтган Тошкентнинг «Ҳумо» ва Остонанинг «Номад» жамоалари ўртасидаги учрашувга ташриф буюришга қарор қилган.
Суратда спорт вазири Адҳам Икромов ва тадбиркор, ERIELL Group, Enter Engineering нефт-сервис компаниялари (муз мажмуасини қурган) бошқаруви раиси Бахтиёр Фазиловни ҳам кўриш мумкин.
«Маълумки, ҳар икки етакчи ҳам ушбу спорт турини яхши кўради. Александр Лукашенко мамлакатда хоккейнинг ривожланишини қўллаб-қувватлаш билан чекланмай, ўзи ҳам Беларусь ҳаваскорлар чемпионатида ўз жамоаси таркибида музга чиқади. Шавкат Мирзиёев эса Тошкентда хоккейнинг тикланишига бевосита ҳисса қўшди. Унинг кўмаги туфайли пойтахтда Humo Arena — сиғими бўйича Марказий Осиёдаги биринчи, МДҲда «Минск-Арена»дан кейинги иккинчи ўринда турувчи муз саройи қурилди», — дея таъкидлади БEЛТА.
Агентликнинг қайд этишича, Шавкат Мирзиёев 2019 йилда Беларусга расмий ташриф билан келганида Александр Лукашенкога шу мавзуга мос эсдалик совғаси — хоккейчи ҳайкалини совға қилган.
Президент матбуот хизматининг маълум қилишича, ўйин якунида олий мартабали меҳмонларга уларнинг исмлари туширилган хоккей кийими топширилган.
Президентлар 8 февраль куни Тошкентда расмий музокаралар ўтказади.
«Газета.uz» мухбирининг хабар беришича, «Ўзбекистон» метро бекатининг Humo Arena`га чиқиш йўли Миллий гвардия ходимлари томонидан тўсиб қўйилган ва одамлар ичкарига киритилмаган. «Миллий гвардия ходимлари чиқиш йўлини тўсиб қўйиш сабабини тушунтирмади. Одамлар яна қанча туриш кераклигини сўради, чунки уларнинг кўпчилиги Халқлар дўстлиги саройидаги концертга кетаётган эди. Оқибатда концертга кетаётганлар орқага қайтиб, саройга Tashkent City томон билан пиёда борди», — деди журналист.
Беларусь президенти Ўзбекистонга расмий ташриф билан 1994 ва 2018 йилларда, амалий ташриф билан 2016 (икки марта) ва 2022 йилларда келган. 2014 ва 2019 йилларда Ўзбекистон президентининг Беларусга расмий ташрифлари бўлиб ўтган.
