Шавкат Мирзиёев 5 февраль куни йиғилишда касалликларни эрта аниқлаш, жумладан, кардиология, эндокринология ва онкология скринингларини ташкил этишда йўл қўйилаётган камчиликлар кўрсатиб ўтилди. Бу ҳақда президент матбуот котиби хабар қилди.
Қайд этилишича, 2023 йили онкология касаллиги билан рўйхатга олинган беморларнинг қарийб ярмида касаллик кеч аниқланган.
Жойларда диспансер назоратида турган, сурункали касаллиги бор аҳолини соғломлаштириш ишлари етарли эмас. Умуман, вилоят ва туман тиббиёт идоралари профилактика ўрнига «одамлар қачон касал бўлса, шунда даволаймиз» деб, ҳали ҳам эскича фикрлаб юргани танқид қилинди.
Таъкидланишича, хавф гуруҳига кирувчи аҳолини юрак қон-томир, онкология ва эндокрин касалликлари скринингидан ўтказиш тизими ўзгартирилади.
Хусусан, скрининг учун бевосита республика кардиология, эндокринология, онкология марказлари жавоб беради. Улар бир ҳафтада жойларда скрининг текширувларини ўтказишни бошлайди. Шунингдек, онкология бўйича ҳар бир эрта аниқланган ҳолат учун тиббиёт бригадаларига мукофот бериш жорий қилинади.
Бу тажриба 1 майдан Қашқадарёда бошланади ва келгуси йилдан бошқа ҳудудларда йўлга қўйилади.
