Тошкент шаҳрида метрода қизга шаҳвоний шилқимлик қилган эркакка нисбатан суд ҳукми ўқилди. «Газета.uz» суд қарори акс этган ҳужжатни ўрганди.
Суд 2024 йил 31 январь куни ёпиқ тарзда ўтказилган. Унга кўра, 1993 йилда туғилган фуқаро M.A. (эркак) В.А. (аёл)нинг танасига қадалиб туриш орқали унинг учун номақбул бўлган ҳамда шаъни ва қадр-қимматини таҳқирлайдиган шаҳвоний шилқимлик қилган.
Суд мажлисида М.А. юқорида кўрсатиб ўтилган ҳолатдаги ҳуқуқбузарлик ҳаракатига иқрорлик билдирмаган. У иш қидириб «Чилонзор» бекатига кетадиган электропоездга чиққани, ушбу электропоездга В.А. ҳам чиққани, одамлар кўп бўлгани сабабли поезд ҳаракатланиши бошланганда В.А. орқага кетиб қолгани, у эса йиқилиб тушмаслиги учун унинг елка қисмидан ушлаб қолганини айтиб, кўрсатув берди.
Суд мажлисида В.А. ва унинг қонуний вакили ҳам ўз кўрсатмаларини баён қилди. Қиз эркакнинг кўрсатувларини тасдиқламади. Унинг таъкидлашича, эркак дастлаб электропоездга чиққан вақтида бир маротаба унга қадалиб турган, шунда қиз ушбу ҳаракатлар атайин содир қилинмади деб ўйлаган ва аҳамият бермаган.
Аммо М.А. қиз томонга қадалиб келаверган. Поездда қизга жой беришганидан сўнг у бўш жойга ўтирган. «Буюк ипак йўли» бекатига келганида М.А. тушмасдан, уни вагонда кутиб ўтирган ва орқасидан келган.
Қиз шу сабабли М.А. унга нисбатан шаҳвоний шилқимлик қилаётганини тушунганини айтиб, унга нисбатан оғир жазо тайинлашни сўраган.
Суд ҳукмига кўра, M.А. Маъмурий жавобгарлик тўғрисидаги кодекснинг 41−1-моддаси 1-қисмида (Шаҳвоний шилқимлик қилиш) назарда тутилган ҳуқуқбузарликни содир қилганликда айбдор деб топилиб, 5 сутка маъмурий қамоқ жазоси тайинланди.
Жазо ўталганидан сўнг ҳуқуқбузардан Тошкент шаҳри ИИББ Маъмурий тартибда қамоққа олинган шахсларни сақлаш махсус қамоқхонаси фойдасига сақлаш билан боғлиқ бўлган харажатлар учун маъмурий қамоқнинг ҳар бир суткаси учун БҲМнинг 15 фоизи миқдорида пул ундирилиши белгиланди.
