Киото округи суди 2019 йилда Kyoto Animation студиясига ўт қўйишда айбдор деб топилган 45 ёшли Синдзи Аобани ўлим жазосига ҳукм қилди, деб хабар бермоқда Kyodo ахборот агентлиги.
2019 йилнинг 18 июлида у келтириб чиқарган ёнғин оқибатида 36 киши ҳалок бўлиб, яна 32 киши жароҳат олганди. Бу воқеа Япониядаги энг йирик оммавий қирғинлардан бирига айланган.
Аоба ўз айбини тан олди, аммо адвокатлари ўт қўйиш вақтида у эс-ҳуши жойида бўлмаганини таъкидлаб, жазони енгиллаштиришни сўради. Бироқ судья уни ақли расо деб топди, дея қайд этади Kyodo.
Эркак бинога ўт қўйишга қарор қилганини студия унинг ишини ўғирлаганига ишонгани билан изоҳлади. У Kyoto Animation`ни ўзининг танлов учун юборган романини ўғирлашда айблади. The Japan Times`нинг ёзишича, студия судланувчининг бирон бир асарини ўғирлаганига ҳеч қандай далил йўқ.
Аоба суд ҳукми эълон қилинган мажлисга ногиронлар аравачасида олиб келинган. Эркакнинг ўзи ҳам ёнғинда жиддий куйиш жароҳатларини олган ва ҳужумдан 10 ой ўтиб ҳибсга олингунга қадар интенсив тарзда даволанган.
- Kyoto Animation студияси машҳур аниме асарлари, жумладан, K-On! ва «Харухи Судзумиянинг меланхолияси»ни яратгани билан танилган.
- Японияда ўлим жазоси оғир жиноятлар учун жазо тури сифатида сақланиб қолган ва бир қанча одамни ўлдирганларга нисбатан қўлланади. Ўлим жазоси сўнгги марта 2022 йилда амалга оширилган эди.
