Шавкат Мирзиёев Шэньчжэнь шаҳрига ташрифи доирасида Ипак йўли фонди раиси Чжу Цзюнь билан учрашди, деб хабар қилди давлат раҳбари матбуот хизмати.
Фонд 2014 йилда Хитой раиси Си Цзиньпин ташаббуси билан «Бир макон, бир йўл» лойиҳаси доирасидаги савдо-иқтисодий ва инвестициявий ҳамкорликни молиявий қўллаб-қувватлаш мақсадида ташкил этилган.
Чжу Цзюнь ва Шавкат Мирзиёев.
Учрашувда саноат кооперацияси ва инфратузилмани ривожлантиришни молиявий қўллаб-қувватлаш учун фонд билан биргаликда яратилган инвестиция платформаси имкониятлари кўриб чиқилди.
Сўнг Шавкат Мирзиёев SANY компанияси директорлар кенгаши раиси Сян Вэньбони қабул қилди.
SANY шамол турбиналарини ишлаб чиқарувчи дунёнинг етакчи 10 та компанияси қаторига киради. У шамол энергетикаси қурилмаларини ишлаб чиқариш ва сотишга, шамол электр станцияларини лойиҳалаштириш, қуриш, ишлатиш ва бошқаришга ихтисослашган.
Учрашувда президент компаниянинг Қорақалпоғистонда шамол электр станциясини қуриш, шамол турбиналарининг бутловчи қисмларини, қурилиш ва оғир юк техникасини ишлаб чиқаришни маҳаллийлаштириш бўйича режаларини қўллаб-қувватлади.
Давлат раҳбари эришилган келишувларни амалга оширишни жадаллаштириш бўйича алоҳида «йўл харитаси»ни қабул қилиш топшириғини берди.
Президент CSG компанияси директорлар кенгаши раиси Мэн Чжэньпин билан ҳам учрашди.
Мэн Чжэньпин ва Шавкат Мирзиёев.
Бу Хитойнинг электр тармоқлари соҳасидаги етакчи компаниялардан бири ҳисобланади. CSG тармоқларни қуриш ва бошқаришга ихтисослашган. Компаниянинг бозор капиталлашуви 60 миллиард долларни ташкил этади.
Томонлар кооперация лойиҳаларини амалга ошириш масалаларини муҳокама қилди. Хитой компанияси иштирокида лойиҳалаштириш ва инжиниринг бўйича замонавий тизимларни, энергетик хавфсизликни таъминлаш ва энергия тармоқларида йўқотишларни камайтириш бўйича стандартларини жорий қилишга алоҳида эътибор қаратилди.
