22 январь, душанба куни соат 23:13 да Тошкент шаҳри ва Ўзбекистоннинг бошқа ҳудудларида зилзила сезилди. Пойтахт аҳолисининг «Газета.uz»га маълум қилишича, тебранишлар юқори қаватларда 30−40 сония давомида сезилган.
Сейсмопрогностик мониторинг республика маркази зилзила эпицентри Хитойнинг Шинжон-Уйғур мухтор вилоятининг Қирғизистон билан чегарадош Оқсу туманида бўлганини маълум қилди.
Эпицентрдаги зилзила магнитудаси — 7. Чуқурлиги эса 15 километрни ташкил қилган. Зилзила эпицентридан Тошкентгача бўлган масофа — жануби-шарқий йўналишда 862 километр.
Тошкент шаҳрида зилзила кучи 3 балл, Андижон, Фарғона ва Наманган вилоятларида (зилзила эпицентридан 600−650 километр узоқликда) эса 3−4 баллни ташкил этган.
