18 январь куни Сингапур прокуратураси мамлакат транспорт вазири Субраманиам Исваранни коррупцияда расман айблади. Бу Сингапурда сўнгги 40 йил ичидаги вазир билан боғлиқ биринчи коррупция иши ҳисобланади, деб ёзди CNN.
Исваранга коррупция, давлат хизматчиси сифатида қимматбаҳо буюмлар олиш ва адолат таъминланишига тўсқинлик қилиш каби жами 27 та айблов қўйилган.
Айблов хулосасида малайзиялик миллиардер Онг Бенг Сенг бизнес манфаатларини илгари суриш эвазига вазирга тахминан 119 минг долларлик «қимматбаҳо буюмлар»ни пора сифатида бергани айтилади. Совғалар орасида, жумладан, бизнес-классдаги авиачипталар, ҳашаматли меҳмонхонада яшаш, «Формула 1» Гран-присига чипталар, Англия Премьер-лигаси футбол ўйинлари ва Вест-Энд театри мюзиклларига кириш бор. Айбловлар 2015 йилдан 2021 йилгача бўлган даврни қамраб олади.
Исваран ўтган ёзда ҳибсга олинганди, бироқ суд уни гаров эвазига озод қилган. Вазир таътилга жўнатилган, аммо у ҳали ҳам аввалгидек маош олиб келган, деб ёзди BBC News. Сингапур бош вазири Ли Сянь Лунга йўллаган мактубида у ўзига қўйилган айбловларни рад этиб, тергов бошланганидан бери олган маоши ва депутатлик нафақасини қайтаришини айтган.
Сингапур Transparency International ташкилотининг коррупцияни тушуниш индексида дунёда бешинчи ўринни эгаллайди ва «бенуқсон тоза ҳукумати» билан фахрланади, дея таъкидлади CNN. Вазирларнинг ўртача йиллик маоши тахминан 834 минг долларни ташкил қилади. Бундай юқори маошлар амалдорларни пора олишдан қайтаради.
Сингапурда сўнгги марта 1986 йилда вазир коррупция бўйича тергов қилинган эди. Ўшанда миллий тараққиёт вазири Тэ Чеанг Ван гумонланувчи сифатида жалб қилинган ва айблов қўйилишидан аввал ўз жонига қасд қилган.
