Аргентина терма жамоаси ва «Интер Майами» клуби футболчиси Леонель Месси Лондонда бўлиб ўтган The Best FIFA Football Awards маросимида 2023 йилининг энг яхши эркак футболчиси деб топилди. У овоз топлашда Эрлинг Ҳоланд ва Килиан Мбаппедан ўзиб кетди.
Овоз бериш жараёнида миллий терма жамоа мураббийлари ҳамда сардорлари, шунингдек, журналистлар ва мухлислар иштирок этди. Дастлаб Месси ва Ҳоланд ҳам 48 очкодан тўплаб, натижалари тенг бўлиб қолди. Регламентга кўра, Месси терма жамоа сардорлари томонидан берилган овозлар кўплиги боис совринга эга чиқди. Франция терма жамоаси ҳужумчиси Мбаппе 35 очко билан учинчи ўринни эгаллади.
Овоз беришда Ўзбекистон вакиллари ҳам қатнашди, жумладан, Ўзбекистон терма жамоаси сардори Элдор Шомуродов қуйидагича овоз берган: 1) Месси; 2) Мбаппе; 3) Ҳоланд.
Ўзбекистон терма жамоаси мураббийси: 1) Месси; 2)Ҳоланд; 3) Мбаппе.
Шарҳловчи Даврон Файзиевнинг танлови эса қуйидагича бўлди: 1) Ҳоланд; 2) Месси; 3) Мбаппе.
Месси 2019 ва 2022 йилда ҳам ФИФАнинг энг яхши эркак футболчиси совринини қўлга киритганди.
Шунингдек, Месси 17 марта йил терма жамоаси таркибига киритилган илк футболчи бўлди. Йил тема жамоасида Мессидан ташқари дарвозабон Тибо Куртуа, ҳимоячилар Кайл Уолкер, Жон Стоунс, Рубен Диаш, ярим ҳимоячилар Бернардо Силва, Жуд Беллингем, Кевин Де Бруйне, ҳужумчилар Эрлинг Ҳоланд, Килиан Мбаппе Винисиус Жуниор ўрин олди.
Маросимнинг бошқа совриндорлари:
- Энг яхши аёл футболчи — Аитана Бонмати (Испания, «Барселона»);
- Энг яхши эркак дарвозабон — Эдерсон (Бразилия, «Манчестер Сити»);
- Энг яхши аёл дарвозабон — Мари Эрпс (Англия, «Манчестер Юнайтед»);
- Энг яхши эркак мураббий — Пеп Гвардиола («Манчестер Сити»);
- Энг яхши аёл мураббий — Сарина Уигман (Англия);
- Пушкаш соврини — Гуилҳерме Мадруга.
Эслатиб ўтамиз, Лионель Месси 2023 йилнинг октябрь ойида ўзининг саккизинчи «Олтин тўп»ини қўлга киритганди.
