АҚШнинг «Интер Майами» клуби ва Аргентина терма жамоаси ҳужумчиси Лионель Месси France Football нашри томонидан йилнинг энг яхши футболчиси деб топилди ва «Олтин тўп» соврини билан тақдирланди.
Аргентиналик футболчи учун бу фаолияти давомидаги саккизинчи «Олтин тўп» ҳисобланади ва бу натижа — мутлақ рекорд. Сўнгги бор Лео бу совринни 2021 йилда қўлга киритганди. Месси ўтган мавсумда ўз терма жамоаси сафида Қатарда ўтказилган Жаҳон чемпионатида ғолиб бўлди ва турнирнинг энг яхши футболчиси деб топилди.
Фото: Reuters
Клуб сафида эса у собиқ жамоаси «ПСЖ» билан Франция чемпиони бўлди (Месси чемпионатнинг энг яхши ассистенти деб топилди) ва мамлакат суперкубогига эга чиқди. «Интер Майами» сафида эса клуб тарихидаги биринчи соврин — Лигалар кубогида ғалаба қозонишга ёрдам берди (Лео мусобақанинг энг яхши тўпурари ва футболчиси бўлди).
Фото: Reuters
Аргентиналик футболчи ўзининг биринчи «Олтин тўп»ини 2009 йилда ютган бўлиб, 14 йил ичида у яна еттита шундай совринга эришди.
Овоз бериш натижаларига кўра, Мессидан кейинги ўринларни «Манчестер Сити»нинг норвегиялик форварди Эрлинг Холанд, «ПСЖ»нинг франциялик ҳужумчиси Килиан Мбаппе, ва «Ман Сити» ярим ҳимоячилари Кевин Де Брюйне (бельгиялик) ҳамда Родриго эгаллади (испаниялик).
Бошқа совринлар
Аёллар ўртасида йилнинг энг яхши футболчиси деб «Барселона» ярим ҳимоячиси Айтана Бонмати топилди.
Фото: Reuters
Копа соврини Мадриднинг «Реал» клуби футболчиси Жуд Беллингемга топширилди. Мазкур соврин 21 ёшгача бўлганлар ўртасида йилнинг энг яхши ёш футболчисига топширилади. Беллингем 2003 йилда туғилган.
Фото: Goal
Йилнинг энг яхши дарвозабонига бериладиган Лев Яшин соврини Аргентина билан жаҳон чемпиони бўлган «Астон Вилла» футболчиси Эмилиано Мартинесга топширилди.
Фото: «Олтин тўп» совринининг X ижтимоий тармоғидаги расмий саҳифаси
Сократес соврини футболдан ташқаридаги фаолияти учун «Реал» клуби футболчиси Винисиус Жуниорга берилди.
Фото: «Олтин тўп» совринининг X ижтимоий тармоғидаги расмий саҳифаси
Герд Мюллер номидаги йилнинг энг яхши тўпурари соврини «Ман Сити» форварди Эрлинг Холандга топширилди.
Фото: «Олтин тўп» совринининг X ижтимоий тармоғидаги расмий саҳифаси
Эркаклар ўртасида йилнинг энг яхши клуби деб «Манчестер Сити» эътироф этилди.
Фото: «Олтин тўп» совринининг X ижтимоий тармоғидаги расмий саҳифаси
Аёллар ўртасида эса йилнинг энг яхши клуби сифатида «Барселона» эътироф этилди.
Фото: «Олтин тўп» совринининг X ижтимоий тармоғидаги расмий саҳифаси
