Қирғизистон президенти Садир Жапаровнинг айтишича, аввалроқ қочиб кетган Жогорку Кенеш (парламент) депутати Эмил Жамғирчиев «Салимбой» лақаби билан танилган Ўзбекистондаги тадбиркор Салим Абдувалиевдан ««икки дўст»ни йўқ қилишга ёрдам беришни» сўраган.
«Менга тақдим этилган маълумотларга кўра, [Жамгирчиев] Қирғизистон-Ўзбекистон давлат чегарасини ноқонуний кесиб ўтиб, „Салимбой“ лақабли криминал авторитет Салим Абдувалиев билан учрашиб, „икки дўстни“ йўқ қилишга ёрдам беришни сўраган», — деди Жапаров «Кабар» ахборот агентлиги билан интервьюсида.
Kloop, Kaktus.media ва Sputnik агентлигининг қайд этишича, қирғизистонликлар президент Садир Жапаров ва Миллий хавфсизлик давлат қўмитаси (МХДҚ) раҳбари Қамчибек Ташиевни «икки дўст» ёки қирғиз тилига таржима қилинган «эки досами» деб аташади.
Қирғизистон раҳбари депутат иши бўйича терговни Миллий хавфсизлик давлат қўмитаси ходимлари Ўзбекистон махсус хизматлари билан биргаликда олиб боришганини қўшимча қилди. «Натижа қандай бўлиши менга қизиқ эмас», — деди у.
Аввалроқ «Газета.uz» Ўзбекистон ва Қирғизистон ҳуқуқ-тартибот идоралари Жамғирчиевга нисбатан 2022 йил декабрида ўзбек-қирғиз чегарасини ноқонуний кесиб ўтишда гумон қилиб, жиноий иш қўзғатгани ҳақида ёзган эди. Ўзбекистонда бундан ташқари, у фирибгарликда ҳам гумон қилинмоқда.
Қирғизистон Миллий хавфсизлик давлат қўмитаси раҳбарига кўра, Жамғирчиев бир неча ойдан бери Ўзбекистонда ҳибсда сақланаётган Салим Абдувалиев билан учрашиш учун чегарани ноқонуний кесиб ўтган. Сўроқ пайтида Абдувалиев Жамғирчиев келганини ва «ундан Қирғизистонда тартиб ўрнатишни сўраганини» тасдиқлади.
Жамғирчиевнинг қаерда экани 9 январь, парламент биносидан қочиб кетганидан бери маълум эмас. 10 январь куни Жогорку Кенеш депутатни жиноий жавобгарликка тортишга рози бўлди. 12 январь куни Қирғизистон Миллий хавфсизлик давлат қўмитаси Жамғирчиев сўроқ қилингани ва тергов органларига келиш мажбурияти остида қўйиб юборилгани ҳақида хабар берди.
