13 январь куни Қозоғистоннинг Ақтўбе вилоятида носоз автобусдан 55 нафар Ўзбекистон фуқароси эвакуация қилинди, дея хабар бермоқда мамлакат фавқулодда вазиятлар вазирлиги.
Республика аҳамиятига молик Самара-Чимкент автомобиль йўлининг 965-километрида Тошкент-Қозон (Россия) йўналишида ҳаракатланаётган йўловчи автобуси носозлик туфайли тўхтаб қолган. Автобусда 55 нафар Ўзбекистон фуқароси бўлган.
Йўловчилар ФВВ ходимлари томонидан Қорабутак қишлоғи масжидига кўчирилган, уларга тиббий ёрдам керак бўлмаган, дейилади хабарда.
Йўловчиларга об-ҳаво ёмонлашганда ва автомобиль йўлларида ҳаракат чекловлари мавжуд бўлганда йўлга чиқмаслик, транспортнинг техник ҳолатига эътибор бериш тавсия қилинган.
