Латвия пойтахти Рига шаҳрида Wolt етказиб бериш хизматининг ўзбекистонлик курьери Ҳасан Азларов буюртмани кутиш вақтида ресторанларда пианино чалиши ортидан машҳур бўлди. Унинг ижроси акс этган видео интернетга жойлаштирилган.
Мамлакат оммавий ахборот воситалари болалигидан пианино чалиш билан шуғулланган тошкентлик курьер ҳақида ёза бошлади ва куни кеча у ҳақда Латвия телевидениесининг «Бугун тунда» дастурида репортаж намойиш этилди.
Ҳасан эгизак укаси Ҳусан билан пойтахтдаги машҳур Глиэр номидаги махсус мусиқа мактабида таҳсил олган. Фортепиано ўқитувчим Милова Виолетта Фёдоровна бўлган, дея сўзлаб берди у «Газета.uz»га.
«Мен 7 ёшимдан бери пианино чалиб келаман. Биз ҳар куни икки соат мактабда ва тўрт соат уйда шуғулланрдик», — деди у Латвия телевидениесига берган интервюсида.
Ҳасан Театр институтининг телевидение ва кино режиссёрлиги факультетини тамомлаган. 2021 йилда Латвия Ахборот тизимлари менежменти университети (ISMA)нинг магистратура босқичига ўқишга кирган. Бўш вақтида новвой бўлиб, кейинчалик етказиб бериш хизматида ишлаган. Ҳусан Тошкент консерваториясини тамомлаган ва ҳозир АҚШда яшайди.
Ҳасан Ригадаги ўқишни тугатгандан сўнг 2023 йилнинг баҳорида Тошкентга қайтган. Ўша йилнинг август ойида Латвия компаниясининг таклифига биноан яна Ригага борган. Ҳужжатлар расмийлаштирувини кутиш давомида етказиб бериш хизматида ишлай бошлаган. Бироқ кейинроқ уни таклиф қилган компания бозор конъюнктураси ўзгаргани сабабли ишга ололмаслигини маълум қилган.
Шу тариқа баъзида Ҳасан буюртмани кутиш чоғида ресторанларда пианино чалиб турган. Интернетда у ҳақда ёзишни бошлаганларидан сўнг мижозлар Ҳасанни таний бошлаган ва унга турли жойлардан иш таклифлари туша бошлаган.
«Ўзбек ресторанларидан таом буюртма қилишганда мижозларга ҳазил тариқасида буюртмани курьер Ўзбекистондан олиб келганини айтаман», — дейди Ҳасан.
«Мен учун пианино чалиш — унутиб қўймаслик учун машқ. Шунингдек, томошабинларнинг сизни тинглашлари ёқимли», — деди у Латвия телевидениесига берган интервюсида.
Видео
