Исроил қуролли кучлари Ғазо секторида ҲАМАСга қарши урушнинг интенсив қуруқлик ва ҳаво амалиётидан «нисбатан йўналтирилган босқичига» ўтишни бошлади. Бу ҳақда Исроил мудофаа кучлари (IDF) расмий вакили Даниэль Ҳагари The New York Times`га берган интервьюсида маълум қилди.
Ҳагарининг сўзларига кўра, урушнинг янги босқичи Исроил қўшинлари сони ва Ғазога ҳаво ҳужумларини қисқартиришни ўз ичига олади. Бунинг ўрнига Исроил кучлари кўпроқ ҲАМАС етакчиларини йўқ қилиш, гаровга олинганларни қутқариш ва туннелларни вайрон қилишга қаратилган юқори сифатли кичик гуруҳларнинг «жарроҳлик миссиялари»га таянади.
Исроил, шунингдек, ҲАМАСнинг Хан-Юнис ва Дейр-эль-Балаха пунктларидаги жанубий ҳамда марказий истеҳкомларига эътибор қаратиш ниятида, деди Ҳагари.
CNN ҳам, шунингдек, АҚШ президенти маъмуриятининг бир қанча юқори мартабали амалдорларига таяниб, январгача Тел-Авив Ғазода нисбатан камроқ интенсив бўлган стратегияга ўтишни режалаштираётганини ёзди.
«Бироқ Исроил расмийлари АҚШ вакилларига ўтиш жараёнини ой (январь) охиригача якунлашга умид қилаётган бўлишса-да, аниқ муддат йўқлигини айтган. Агар Исроил кучлари ҲАМАСнинг кутилганидан кучлироқ қаршилигига ёки ўзлари кутмаган таҳдидларга дуч келса, уларнинг таъкидлашича, [аскарларни] олиб чиқиш кўлами ва суръати секинлашиши, интенсив ҳаво ҳужумлари эса давом этиши мумкин», — деб ёзди NYT.
Исроил расмийлари аввалроқ ҳам очиқ, ҳам ёпиқ тарзда Ғазодаги урушнинг якуний мақсади ҲАМАСни октябрь ойида амалга оширган ҳужумини қайтиб такрорлай олмайдиган даражада заифлаштириш эканини билдирган эди.
- 2023 йил 7 октябрда Фаластиннинг ҲАМАС гуруҳи Исроилга ҳужум қилиб, камида 1200 исроилликни ўлдирган, 200 дан ортиғини гаровга олганди.
- Бунга жавобан Исроил Ғазо секторини назорат қилаётган ҲАМАСга қарши уруш эълон қилди, анклавга интенсив ҳаво ҳужумлари уюштирди ва у ерга қўшин юборди.
- Ғазо Соғлиқни сақлаш вазирлиги маълумотларига кўра, операция давомида минтақада 23 мингдан ортиқ одам ҳалок бўлган, 59 мингга яқин киши жароҳатланган.
- Уруш бошланганидан бери бутун дунё бўйлаб минглаб одамлар Фаластинни қўллаб-қувватлаш бўйича ва Исроилнинг Ғазодаги ҳаракатларига қарши намойишлар ўтказмоқда.
