![Эквадорда қуролли ҳужумлар ортидан фавқулодда ҳолат эълон қилинди. Асосий маълумотлар]()
Фото: TC Television`нинг ҳужум пайтидаги жонли эфиридан кадр.
Эквадорда қуролли ҳужумлар ортидан фавқулодда ҳолат эълон қилинди. Асосий маълумотлар
Эквадорда телеканалга жонли эфир вақтида қуролли шахслар бостириб кириб, ходимларни гаровга олди ва «мафия билан ўйнашмасликни» айтди. Мамлакатда ҳужумлар сабаб 10 киши ҳалок бўлди. Президент «ички қуролли конфликт» режимини эълон қилди. Аввалроқ йирик жиноий гуруҳ раҳбарлари қамоқдан қочганди.
9 январь куни Эквадорнинг TC Television телеканалининг Гуаякиль шаҳридаги студияси жонли эфир вақтида қуролланган шахслар томонидан эгаллаб олинди. Мамлакатда 60 кунлик фавқулодда ҳолат эълон қилинган. «Газета.uz» воқеа бўйича «Медуза»да эълон қилинган асосий маълумотларни таржима қилди.
Телеканалга уюштирилган ҳужум акс этган кадрларга кўра, жиноятчилар канал ходимларидан полга ётишларини талаб қилиб, қурол билан қўрқитган. Ҳужумчилар бир неча бор «Полиция йўқ!» дея такрорлаган. Телеканалда қичқириқ ва отишма овозлари эшитилган. «Биз эфирдамиз, билиб қўйингки, мафия билан ўйин ўйнолмайсиз», — деган ҳужумчилардан бири. Жараён тахминан 20 дақиқа давомида жонли эфирда намойиш этилган.
El Universo газетасига кўра, маҳаллий вақт билан соат 15:00 да бошланиши керак бўлган эфирдан аввал телеканал студиясига қуролланган одамлар кириб келган. Гувоҳларнинг айтишича, улар камида 10 кишини кўрган.
![эквадор]()
Барча гаровга олинганлар озод қилинган, телеканалга ҳужум пайтида ҳеч ким ҳалок бўлмаган. Полиция ҳужумга алоқадор 13 кишини ҳибсга олди. Жиноятчилардан портловчи моддалар, иккита тўппонча ва бошқа қуроллар топилган. Бошқа оммавий ахборот воситаларининг офислари жойлашган телеканал биносидан 40 га яқин одам эвакуация қилинган.
Ҳибсга олинганларнинг барчаси 16 ёшдан 25 ёшгача бўлган ёшлар ва илгари улар жиноий жавобгарликка тортилмаган. Ҳибсга олинганлар орасида икки нафар вояга етмаганлар, шунингдек, Венесуэланинг бир фуқароси ҳам бор. Барча ҳибсга олинганлар террорчиликда айбланган ва уларга 13 йилгача қамоқ жазоси тайинланди.
Эквадор президенти Даниэль Нобоа телеканал эгаллаб олингач, мамлакатда «ички қуролли конфликт» режимини эълон қилди, шунингдек, 22 та уюшган жиноий гуруҳни террорчи ташкилот деб эълон қилиш бўйича фармон чиқарди.
Мамлакатда 60 кунлик фавқулодда ҳолат эълон қилинди. Эквадор қуролли кучлари жиноий гуруҳлар ҳарбий нишон сифатида кўрилишини билдирди.
Эквадордаги мафия
Бир неча кун олдин энг йирик жиноий гуруҳ «Лос Чонерос»нинг раҳбари Адольфо Масиас, шунингдек, бошқа жиноий гуруҳ — «Лос-Лобос»нинг етакчиси Фабрисио Колон Пико қамоқдан қочиб кетган. Мамлакат бўйлаб бир қанча ахлоқ тузатиш муассасаларида тартибсизликлар содир бўлди. Камида 139 нафар қамоқхона қўриқчиси гаровга олинган, деб хабар берди Reuters.
Эквадор провинцияларидаги полициячилар ҳам гаровга олинган. Куэнка шаҳрида номаълум шахслар ҳарбий юк машинасига қўлбола бомба улоқтирган. Портлашлар Эсмеральдас, Мачала, Лос-Риос ва бошқа шаҳарларда ҳам содир бўлди. Эквадорда фавқулодда ҳолат эълон қилинганидан бери камида 10 киши ҳалок бўлган. Улардан саккиз нафари Гуаякилда вафот этган.
Эквадор пойтахти Китонинг тарихий марказига талончилик ҳақидаги хабарлардан сўнг ҳарбий техникалар жойлаштирилди. Аэропортда хавфсизлик чоралари кучайтирилган. Шаҳар аҳолиси уйларини тарк этмасликка чақирилди.
Associated Press`нинг таъкидлшича, зўравонликнинг авж олиши 2021 йилда қамоқхоналардаги ҳужумлар билан бошланган ва 2023 йил августида — президентликка номзод Фернандо Вильявисенсио Китода ўлдирилганида янги даражага кўтарилган.
Эквадор ҳукумати зўравонликларнинг авж олишига жиноий гуруҳлар ўртасидаги қамоқхоналар назорати бўйича келишмовчиликлар сабаб бўлганини айтмоқда. Ҳукумат маълумотларига кўра, зўравонликлар оқибатида 2023 йилда 8008 киши ўлган, бу 4,5 мингдан ортиқ одам ҳалок бўлган 2022 йилдаги кўрсаткичдан деярли икки баравар кўп.
