Ўзбекистон президенти Шавкат Мирзиёев 9 январь куни Тошкент давлат цирки биносини таъмирлаш режалари билан танишди, деб хабар қилди давлат раҳбари матбуот хизмати.
Шавкат Мирзиёев 22 декабрь куни бўлиб ўтган Республика Маънавият ва маърифат кенгаши йиғилишида цирк фаолиятини такомиллаштириш масаласини кўтарганди.
Тақдимот давомида цирк биносини реконструкция қилиш, шунингдек, таълим ва амалиётни уйғунлаштириш мақсадида 300 ўринли ўқув биносини қуриш режалари муҳокама қилинди.
«Ўзбекистон 24» телеканали тақдим этган тақдимотга кўра, цирк ёнида ўқув биносини жойлаштириш учун иккита жой кўриб чиқилмоқда.
Объектнинг майдони 2650 квадрат метрни ташкил қилади, ётоқхона сиғими 100 кишига мўлжалланган. Лойиҳа қиймати 15 миллиард сўмга баҳоланмоқда.
2019−2020 йилларда Тошкент циркида капитал реконструкция ишлари амалга оширилганди. Реконструкция бюджети 46,63 миллиард сўмга баҳоланганди.
