Ўзбекистонда 1 мартдан бошлаб тадбиркорлик субъектлари учун 16 турдаги лицензия ва рухсатномалар бекор қилинади. Бу давлат раҳбарининг янги қарорида назарда тутилган, деб хабар қилди ҳужжатни ишлаб чиққан Адлия вазирлиги матбуот хизмати. Бу ҳақда президент Шавкат Мирзиёев бир кун аввал бўлиб ўтган йиғилишда гапирганди.
Хусусан, 7 турдаги рухсат берувчи ҳужжат тўлиқ бекор қилинади. Масалан, божхона ташувчилари реестрига киришда юкларни ташиш учун рухсатнома талаб қилинмайди.
6 турдаги рухсат берувчи ҳужжат бирлаштириш йўли билан бекор қилинади. Хусусан, экспорт назорати объектларини олиб чиқиш учун рухсатнома ҳамда махсус товарлар экспорти ва импорти учун лицензия бирлаштирилади.
Лицензия ва рухсатнома хабарнома тартибига ўтказилади. Эндиликда турагентлик фаолияти билан лицензиясиз шуғулланиш мумкин бўлади. Шунингдек, лицензия ёки рухсатномани беришда талабгорларни видео алоқа ёрдамида масофадан туриб баҳолашга рухсат этилмоқда.
Чиқиш туризмини амалга оширишда 15 минг доллар миқдоридаги маблағни Хавфсиз туризм жамғармасига захира қилиб қўйиш бекор қилинади.
Бундан ташқари, юридик шахсларга тегишли транспорт воситасини техник кўрикдан ўтказиш жойларини ихтиёрий равишда танлаш мумкин. Бугунгача техник кўрикдан ўтказиш ички ишлар органлари томонидан белгиланган жойларда ўтказилаётганди.
Ўзгартиришларнинг амалга оширилиши натижасида тадбиркорларнинг қарийб 350 млрд сўмлик харажатлари тежалади, дейилади хабарда.
Душанба куни президент ўтказган йиғилишда шу пайтгача тадбиркорлардан мавжуд маълумотларни қўшимча равишда талаб қилиш ҳолатлари борлиги таъкидланди. Шу боис жорий йилдан бошлаб 34 турдаги ҳисоботлар бекор қилинмоқда. Бунинг натижасида ҳар йили 21 мингдан ортиқ тадбиркорнинг 500 миллион сўм харажати тежалади.
Шавкат Мирзиёев тадбиркорлар томонидан тақдим этиладиган ҳисоботларнинг ягона рўйхати тасдиқланмаганига ҳам тўхталиб, ягона ҳисоботлар тизимини жорий қилиш бўйича топшириқ берди.
Янгилик тўлдирилиши мумкин.
