Экология, атроф-муҳитни муҳофаза қилиш ва иқлим ўзгариши вазирлиги чиқинди ташишда электрда юришга мўлжалланган транспорт воситаларидан фойдаланишни бошлади, дея хабар бермоқда вазирлик матбуот хизмати.
Электротехника воситаси Chengdu Shiny Technology компанияси билан ҳамкорликда Eko House чиқиндилар кластери томонидан Хитойдан импорт қилинган.
Электромобиль Жиззах вилоятида синовдан ўтказилади. У тор кўчаларда ҳаракатланиш учун мўлжалланган бўлиб, 300 км масофани босиб ўта олади, бу эса кун давомида аҳоли пунктларидан чиқиндиларни олиб чиқиб кетиш ва полигонларга ташиш имконини беради. Ушбу техника 3 тоннагача юк кўтара олади.
«Электромобиль Хитойнинг Ченжу шаҳрида ишлаб чиқарилган. Экологик жиҳатдан зарарсиз. Ўзбекистон билан ўзаро ҳамкорликдан мамнунмиз ва келажакда чиқинди ташийдиган электромобилларни Ўзбекистонда ишлаб чиқаришни режалаштирганмиз», — деди Хитой компанияси мутахассиси Вей Го.
