Марказий банк ўзини ўзи банд қилган шахслар ва кичик тадбиркорлик субъектларини молиялаштиришда кўшимча имкониятлар яратишни режалаштирмоқда, дея хабар қилди «Газета.uz» мухбири.
Унга кўра, 2024 йил 1 февралдан доимий даромадга эга бўлган, шунингдек, камида 6 ой давомида банк ҳисобварағида маблағлар айланмасига эга бўлган ўзини ўзи банд қилган шахслар ва кичик тадбиркорлик субъектларига кўрсатиладиган микромолиявий хизматлар, бундан ташқари, худди шу мақсадлар учун микромолия ташкилотларига ажратилган маблағлар учун таваккалчилик даражаси 100 фоиздан 75 фоизгача пасайтирилмоқда.
Марказий банк бу орқали таваккалчилик даражаси ва капиталга босим пасайиши ва банкнинг кредитлаш имконияти 33 фоизга ортишини қайд этди.
Маълумот ўрнида, кичик тадбиркорлик субъектлари деганда якка тартибдаги тадбиркорлар, микрофирмалар (таъсисчилари жисмоний шахслар бўлган ҳамда жами даромади календарь йил давомида 1 млрд сўмгача бўлган тадбиркорлик субъектлари) ва кичик корхоналар (жами даромади календарь йил давомида 1 млрд сўмдан 10 млрд сўмгача бўлган тадбиркорлик субъектлари) назарда тутилмоқда.
Аввалроқ Марказий банк 1 июлдан қарз юки ҳисобини барча кредитлар кесимида жорий этишни режалаштираётгани, регулятор бу санадан бошлаб ортиқча қарз юкининг олдини олиш мақсадида қарз берувчиларга мижозларининг қарз юки 60 фоиздан ошиб кетмаслиги бўйича талаб қўймоқчи эканини хабар қилгандик.
