Ўзбекистонда Янги йил байрами муносабати билан эълон қилинган 30 декабрдан 2 январгача бўлган дам олиш кунларида тиббиёт муассасалари 24 соат ишлайди. Бу ҳақда Соғлиқни сақлаш вазирлиги хабар қилди.
Шу даврда қуйидаги даволаш-профилактика муассасаларининг 40 минг нафар тиббиёт ходими қонунда белгиланган тартибда, навбатчилик асосида аҳолига хизмат кўрсатади:
- 207 та туман ва шаҳар кўп тармоқли марказий поликлиникалари;
- 1074 та оилавий поликлиникалар;
- туман, вилоят ва республика шифохоналари;
- ихтисослаштирилган тиббиёт марказлари;
- тиббиёт олий ўқув юртлари клиникалари.
Республика шошилинч тиббий ёрдам илмий маркази, унинг ҳудудлардаги 13 та филиали, туманлардаги 181 та шошилинч тиббий ёрдам қабул бўлими ҳамда туманлараро қўшма шикастланишлар ва ўткир қон-томир касалликлари марказларида 24 соат давомида навбатчи шифокор ва ҳамширалар фаолият юритади.
Қайд этилишича, ушбу муассасалар зарур дори-дармонлар билан таъминланиб, захира ўринлари яратилган. Республика бўйича 2835 та тез тиббий ёрдам бригадаси аҳолидан бўладиган чақириқлар асосида куну тун хизмат кўрсатади.
Бундан ташқари, 229 та туғуруқ, 245 та болалар даволаш муассасаcи ҳам узлуксиз иш олиб боради.
«Соғлиқни сақлаш вазирлиги байрам кунларида меҳнат қиладиган барча тиббиёт ходимларига ўз миннатдорлигини билдиради», — дейилади хабарда.
