26 декабрь куни Самарқанд давлат тиббиёт университети ҳузуридаги Нейрохирургия ва нейрореабилитация марказида Ўзбекистонда илк бор паркинсон касаллигини жарроҳлик йўли билан даволаш бўйича комплекс технологик операция ўтказилди, дея хабар қилди олийгоҳ матбуот хизмати.
Операцияда беш йил давомида паркинсон касаллиги билан оғриб келаётган 63 ёшли беморнинг бош қисмига чип ўрнатилган.
Хабарда айтилишича, операция Medical Park клиникаси (Истанбул, Туркия) етакчи мутахассиси, профессор Саид Ўзтурк иштирокидаги халқаро илмий-амалий семинар ва маҳорат дарси доирасида амалга оширилган. Ушбу клиникада университет маълумотларига кўра, минг хил турдаги мураккаб нейрохирургия операциялари ўтказилади.
Операциядан сўнг СамДТУ Нейрохирургия кафедраси ва Medical Park клиникаси ўртасида Нейрохирургия ва нейрореабилитация марказида паркинсон касаллигини жарроҳлик йўли билан даволаш бўйича кадрлар тайёрлаш юзасидан келишувга эришилган.
Жаҳон соғлиқни сақлаш ташкилоти маълумотларига кўра, паркинсон касаллиги — жисмоний фаолиятни сусайтирадиган ва руҳий касалликлар, уйқу бузилиши, оғриқ ва бошқа муаммоларини келтириб чиқарадиган мия касаллиги. Унинг кенг тарқалган белгилари титроқ, оғриқли мушаклар қисқариши ва нутқ муаммоларини ўз ичига олади.
Касалликни даволаб бўлмайди, аммо унинг аломатларини турли хил терапия ва дори-дармонлар билан камайтириш мумкин. Кўп ҳолларда паркинсон касаллиги ногиронликка ва ташқи ёрдамга муҳтожликка олиб келади. У билан оғриган кўплаб одамларда деменция (хотира, диққат ва нутқнинг бироз даражада бузилиши) ривожланади.
Паркинсон, одатда, кекса одамларда учрайди, лекин ёшларда ҳам пайдо бўлиши мумкин. У аёлларга қараганда эркакларга кўпроқ таъсир кўрсатади.
Касалликнинг сабаби номаълум, бироқ унинг ривожланиш хавфи паркинсон касаллиги билан оғриган қариндошлари бўлган одамларда юқори. Касаллик хавфи ҳавонинг ифлосланиши ва пестицидлар ва эритувчилар таъсирида ошиши мумкин.
СамДТУ ҳисоботида қайд этилишича, паркинсон касаллиги дунё бўйлаб ҳар 1000 кишидан 1−3 нафарида (0,1−0,3 фоиз) учрайди. Сўнгги пайтларда Ўзбекистонда ҳам ушбу касалликка чалинганлар сони ортиб бормоқда, дея қайд этди университет.
