UzAuto Motors компанияси харидорлар томонидан «сотувга» жойланаётган шартномалар мониторингини олиб бормоқда. Уларнинг махсус маълумотлар базаси шакллантирилади, дея хабар берди компания матбуот хизмати.
Хабарда бу маълумотлар асосида қандай чора кўриш режалаштирилаётгани ҳақида маълумот берилмаган. Компания харидорларни яна бир бор огоҳ ва ҳушёр бўлишга чақирган ва учинчи шахслар томонидан тўлов қилинмаган автомобиль шартномаларини «сотиб олмасликларини» сўраган.
«Эслатиб ўтамиз, шартномани бошқа шахсга қайта расмийлаштириш мумкин эмас — харид қилинган автомобиль фақат шартномада дастлаб кўрсатилган шахсга рўйхатдан ўтказилиши мумкин. Агар сиз бундай шартномаларни „сотиб олсангиз“, кейинчалик автомобиль сизга қайта расмийлаштирилмаслигининг хавфи юқори. Қолаверса, агар автомобиль эгасининг яқин қариндошлари (турмуш ўртоғи, фарзандлари) сотишга рухсат беришдан бош тортган тақдирда, уни қайта рўйхатдан ўтказиб бўлмайди», — дейилади UzAuto Motors хабарида.
Бундай келишувларда автомобиль учун тўлиқ тўлов қилиш кераклиги талаб қилиниши мумкинлиги инобатга олинса, харидор бу билан нафақат шартнома учун «тўлов»ни, балки автомобилга учун қилинган барча суммани йўқотиш хавфи мавжуд.
«Агар сиз бундай келишувлар иштирокчиси бўлсангиз, UzAuto Motors харидор олдида ҳеч қандай жавобгарликни ўз зиммасига олмайди», — дея қайд этган компания.
UzAuto Motors хабарида, шунингдек, бундай таклифлар айнан компания ёки дилерлик маркази вакиллари томонидан билдирилса, тегишли чора-тадбирларни кўриш учун компаниянинг Call-марказига (+998 78 141 77 77) ёки info@uzautomotors.com электрон почта манзилига мурожаат қилиш сўралган.
Маълумот ўрнида, UzAuto Motors 25−27 декабрь кунлари 2024 йилда ишлаб чиқарилиши ва ички бозорда сотилиши режалаштирилаётган оммабоп автомобиллар учун контрактациясини очиб, жами 171,2 мингдан ортиқ шартнома берди.
Шундан сўнг мазкур шартномаларни расмийлаштиргандан баъзилари ижтимоий тармоқлар ва сайтлар орқали шартномасини «cотмоқчи экани» ҳақида эълонлар жойлади.
