UzAuto Motors фаолиятида техник носозликлар кузатилган ва киберҳужумларга учраган контрактация тизимини қайта ишга туширди, дея хабар бермоқда компания матбуот хизмати.
22 декабрь соат 12:00 да оммабоп автомобилларнинг 2024 йилги бутун ишлаб чиқариш режаси учун онлайн контрактация бошланиши билдирилганди. Компаниянинг маълум қилишича, UzavtoSavdo тизимида соат 10:00 дан бошлаб қатор ташқи таъсирлар кузатилган ва бунинг натижасида тизимга мурожаатлар сони 1 сонияда 50−60 мингга етган.
«Тизимга автомобиллар учун контрактация бошлангандан сўнг қилинган давомли киберҳужумлар, авторизация сўровларини қайта ишлашда муаммоларни юзага келтирди. Бу ўз навбатида, онлайн савдо тизимининг тўлиқ блокланишига олиб келди», — дейилади хабарда.
Компания савдо тизимини қайта тиклаш ишлари якунланганини, контрактация учун Chevrolet Cobalt, Damas ва Labo автомобилларининг режалаштирилган бутун ҳажми сотувда мавжуд бўлишига ишонтирди. Шу билан бирга, қолган бошқа автомобиль моделлари учун контрактация доимгидек тартибда амалга оширилишини эслатиб ўтди.
Оммабоп автомобиллар учун онлайн контрактация 25 декабрь куни соат 14:00 да очилади. Тизим хавфсизлигини таъминлаш учун онлайн контрактация фақат savdo.uzavtosanoat.uz сайти орқали амалга оширилади.
Компания савдо тизимидаги барча ташқи таъсирларни, шунингдек, ахборот ҳужумлари манзиллари ва ташкилотчиларининг тўлиқ таҳлилини ўтказган. Барча материаллар уларга ҳуқуқий баҳо бериш учун тегишли тузилмаларга топширилган.
