UzAuto Motors бир қатор автомобиллари учун 22 декабрь куни соат 12:00 да контрактация очилишини маълум қилди.
Контрактация 2024 йил ишлаб чиқарилиши режалаштирилган Chevrolet Cobalt, Damas ва Labo автомобилларининг бутун ҳажми учун онлайн очилади.
Автомобиль харид қилиш учун шартномани фақат онлайн тарзда расмийлаштириш мумкин. Шу кунларда барча Chevrolet дилерлик марказлари савдо тизимидан ўчирилади ва автосалонларнинг барчаси ёпиқ бўлади, дейилади хабарда.
Chevrolet оммабоп автомобиллари учун шартнома тузиш фақат UzAutoSavdo иловаси, шунингдек, savdo.uzavtosanoat.uz сайти орқали амалга оширилиши мумкин. Telegram бот фақат навбатни кузатиш хизматини ҳамда мавжуд автомобиллар ҳақида маълумотни тақдим этади.
Автомобилни онлайн харид қилиш учун нима қилиш керак?
- OneID тизимида рўйхатдан ўтиш шарт (батафсил);
- UzAutoSavdo мобил иловасини юклаб олиш (iOS учун, Android учун) ва иловада OneID тизимидаги логин ва пароль ёрдамида рўйхатдан ўтиш керак (батафсил);
- Ёки savdo.uzavtosanoat.uz сайтига кириб, бунда ҳам OneID тизимидаги логин ва пароль ёрдамида рўйхатдан ўтиш керак (батафсил);
- Автомобиль модели, ранги ва комплектацияси ҳамда маъқул келган дилерлик марказини танлаган ҳолда, шартнома тузиш керак бўлади.
Қайд этилишича, онлайн шартнома тизими барча учун бепул ва тизимда ҳеч ким учун қандайдир алоҳида киришни таъминлайдиган имкон йўқ.
Компания мижозлардан асоссиз «ажиотаж» чиқармасликни сўраб, контрактация учун Chevrolet Cobalt, Damas ва Labo автомобилларининг 2024 йилдаги бутун ҳажми мавжуд бўлишига ишонтирмоқда. Шунингдек, шу кунларда дилерлик марказларига мурожаат қилмасликларини яна бир бор таъкидлади.
UzAuto Motors, шунингдек, мижозлардан ҳушёр бўлишни ва шахсий маълумотларини, айниқса, давлат порталидаги шахсий маълумотларни учинчи шахсларга бермасликни сўради. «Агарда шартнома тузиш учун шахсий маълумотларингизни учинчи шахсларга топширадиган бўлсангиз, компания харидор олдида ҳеч қандай жавобгарликни ўз зиммасига олмайди», — дейилади хабарда.
