KIUT Тошкент халқаро университети (Тошкент шаҳридаги собиқ Ёджу техника институти) ректори Жанполат Шамуратович Кудайбергенов 46 ёшида пойтахтда вафот этди. Бу маълумотни «Газета.uz»га университет матбуот хизмати тасдиқлади.
Жанпулат Кудайбергенов 1978 йил 10 мартда Нукус шаҳрида туғилган. 2000 йилда Бердақ номидаги Қорақалпоқ давлат университетини, 2001 йилда «Умид» Президент жамғармаси орқали Бирмингем университети (Буюк Британия)ни тамомлаган.
2010−2014 йилларда Тошкент молия институти «Ҳисоб ва аудит» факультети декани лавозимида ишлаган. 2014−2017 йилларда Олий ва ўрта махсус таълим вазирлигида фаолият олиб борган.
2018 йилдан Ёджу техника институтининг ўқув ишлари бўйича проректори бўлган. 2019 йилдан Ўзбекистондаги биринчи хусусий олий ўқув юрти ректори лавозимида фаолият юритган.
Жанполат Кудайбергенов раҳбарлигида университет ўз фаолиятини сезиларли даражада кенгайтирди, кўплаб хорижий олий ўқув юртлари билан ҳамкорликни йўлга қўйди. Бугунги кунда у ерда кундузги, сиртқи ва кечки таълим шаклларида ўзбек, рус ва инглиз тилларида ҳамда иккинчи мутахассислик бўйича бакалавр ва магистрлар тайёрланмоқда. Университетнинг Наманган ва Самарқандда филиаллари мавжуд.
Жанполат Кудайбергеновнинг дафн маросими Нукусда бўлиб ўтади.
