Соғлиқни сақлаш вазирлиги ўз эҳтиёжлари ҳамда тиббиёт форумларига ташриф буюрадиган меҳмонларга совға қилиш учун кундалик, блокнот, ручка, папка, қоғоз пакет, флешка, канцелярия тўплами ва бошқаларни харид қилди. 435 млн 700 минг сўмлик тендерда қатнашган икки тадбиркор ҳам бир корхонага биргаликда эгалик қилади.
Харид комиссияси протоколига кўра, май ойида ўтказилган тендерда иккита иштирокчи қатнашган бўлиб, улардан биринчиси Bresso масъулияти чекланган жамияти ҳисобланади. Мазкур жамиятнинг барча улуши Жалолиддинов Хусомиддин Хусниддин ўғлига тегишли. Компаниянинг устав фонди 2 млрд 245 млн 850 минг сўм бўлиб, амалга ошираётган фаолият тури сифатида соатлар ва улгуржи буюмлар савдоси кўрсатилган. Иккинчи иштирокчи эса якка тартибдаги тадбиркор Миршавкатов Мираъзам Анвар ўғли бўлган.
Orginfo.uz сайти маълумотларига кўра, уларнинг иккиси ҳам камида 2023 йил 10 июлгача Apriori Trade МЧЖ таъсисчилари ҳисобланган.
Ҳозирга келиб эса мазкур корхона улуши Жалолиддинов Хусомиддин Хусниддин ўғлига тўлиқлигича ўтганини кўриш мумкин.
Таъкидлаб ўтиш керакки, тендерда иштирокчиларни манфаатлар тўқнашуви мезони бўйича баҳолашда харид комиссияси уларнинг ҳар иккисига 5 баллдан 1 балл қўйган. Лекин, шунга қарамай, тендер ўтказилган деб топилган.
Эслатиб ўтамиз, «Давлат харидлари тўғрисида»ги қонунга мувофиқ давлат харидлари жараёнида манфаатлар тўқнашувига, шунингдек, нархларни ёки иштирокчиларни саралаш натижаларини бузиб кўрсатиш мақсадида иштирокчиларнинг олдиндан тил бириктиришига йўл қўйилмаслиги белгиланган.
