Андижон вилояти ҳокими Шуҳрат Абдураҳмонов ишлаётган 16 нафар ичимлик суви таъминоти ходимларига нақд кўринишда 4 миллион сўмдан мукофот пули тарқатди. Бу ҳолат акс этган видео ҳокимнинг Telegram`даги саҳифасида эълон қилинди.
Видеода ишчилар кўчаларнинг бирида таъмирлаш ишлари олиб бораётганини кўриш мумкин. Вилоят ҳокими улар билан суҳбатлашаётган вақтда ҳокимлик ходимлари ишчиларга пул тарқатди.
Вилоят ҳокимлиги матбуот хизматининг «Газета.uz»га маълум қилишича, тарқатилган пуллар ҳомийлик маблағлари ҳисобидан бўлган.
Ҳокимнинг кадрда кўринмаган одам билан ишчиларга кийим олиб бериш ҳақида суҳбатлашиб, «Қанча керак бўлса олиб бераман, иссиқ юрсин булар» деганини эшитиш мумкин.
Аввалроқ Шуҳрат Абдураҳмонов Суперлиганинг 17-тури доирасидаги «Андижон» — «Олимпик» (2:1) ўйинидан кейин футболчилар билан учрашиб, гол муаллифи Рубин Ҳебайга исталган автомашинасини танлашини, қолган футболчиларга эса iPhone 14 смартфонлари берилишини ваъда қилганди.
