Fitch Ratings халқаро рейтинг агентлиги Тошкент шаҳрининг хорижий ва миллий валютадаги «BB-» даражасидаги барқарор прогнозли узоқ муддатли кредит рейтинглари бекор қилинганини эълон қилди.
Fitch «Тошкент рейтинг жараёнида иштирок этишни тўхтатишга қарор қилгани» учун рейтингни қайтариб олган.
Агентлик энди асосий кредит омилларини, жумладан, фискал ва қарзни бошқариш сиёсатини кўриб чиқиш учун етарли маълумотга эга эмас. Шу боис молия институти бундан буён Ўзбекистон пойтахти бўйича рейтинг ва таҳлилий ҳисоботларни тақдим этмайди.
Тошкент биринчи марта Fitch рейтингини 2019 йил июнь ойида олган. Агентлик томонидан тақдим этилган кредит рейтинги ва ҳисоботи шаҳарнинг молиявий саломатлиги ва кредитга лаёқатлилиги ҳақида муҳим маълумот манбаи эди. «Қанчалик кўп маълумот бўлса, қанчалик очиқлик, шаффофлик кўп бўлса, шаҳар учун шунчалик яхши», — деди Fitch`нинг Россия/МДҲ ва Қора денгиз минтақаси бўйича минтақавий раҳбари Дмитрий Сурков.
2022 йил декабрь ойидаги сўнгги ҳисоботида агентлик мамлакатда олиб борилаётган молиявий ислоҳот шароитида шаҳар даромадлари барқарорлигини «заифроқ» ва «беқарор» деб баҳолаганди. Пойтахт томонидан йиғиладиган солиқ тушумларининг таркиби ва уларни бошқарувнинг турли бўғинлари ўртасида тақсимланиши марказий ҳокимият ихтиёрига кўра доимий равишда ўзгариб туради.
