Дубайда бўлиб ўтган COP28 иқлим саммити доирасида Ўзбекистон Экология, атроф-муҳитни муҳофаза қилиш ва иқлим ўзгариши вазирлиги ва Tadweer (Абу-Даби чиқиндиларни бошқариш компанияси) ўртасида меморандум имзоланди, деб хабар бермоқда «Газета.uz» мухбири.
Ҳужжатда қаттиқ маиший чиқиндиларни бошқариш соҳасида экологик тоза технологиялар ва хизматларни жорий этиш, шунингдек, маиший чиқиндилардан электр энергияси ишлаб чиқариш заводини ишга тушириш кўзда тутилган.
«Ўзаро ҳамкорликда чиқиндиларни қайта ишлаш инфратузилмасини ривожлантириш, қаттиқ маиший чиқиндиларни йиғиш ва олиб кетиш, саралаш, қайта ишлаш, утилизация қилиш, чиқинди газини йиғиш, электр ва иссиқлик энергиясини ишлаб чиқаришни бошқариш тизимини такомиллаштириш каби муҳим вазифаларни олдимизга мақсад қилиб қўйганмиз», — деди экология вазири Азиз Абдуҳакимов.
Лойиҳа Навоий, Бухоро вилоятлари ва Фарғона водийсига қаратилган техник-иқтисодий асослашдан бошланади, ҳар бир ҳудудда чиқиндиларни йўқ қилиш амалиёти ўрганилади.
Tadweer иштирокида қаттиқ маиший чиқиндиларни йиғиш ва олиб чиқиш, жумладан, уларни саралаш, қайта ишлаш ва утилизация қилиш бўйича бошқарув тизими ишлаб чиқилиши кутилмоқда. Завод электр ва иссиқлик энергияси ишлаб чиқариш учун полигон газини қазиб олишни режалаштирмоқда.
Бундан ташқари, қаттиқ маиший чиқиндилар ишлаб чиқарувчи корхоналарда чиқиндиларни саралаш линиялари ўрнатиш, пластмасса, қоғоз, шиша, алюминий каби иккиламчи хомашёни қайта ишлаш корхоналарини ташкил этиш режалаштирилган.
«Бу ташаббус Ўзбекистонда нафақат қаттиқ маиший чиқиндиларни бошқариш соҳасида инқилоб ясайди, балки иқлим ўзгариши таъсирини юмшатишга ҳам катта ҳисса қўшади. Энг илғор технологиялар ва чиқиндиларни энергияга айлантириш бўйича стратегик ташаббуслар орқали биз атроф-муҳитни муҳофаза қилишда янги мезонларни белгилашга тайёрмиз», — деди Tadweer бош директори Али Ал Дҳаҳери.
Тадқиқотлар шуни кўрсатадики, чиқиндилар ва ресурсларни фаол бошқариш глобал иссиқхона газлари чиқиндиларининг таъсирини 15 -20 фоизга камайтиради, бу эса атроф-муҳит ва иқтисодий жиҳатдан сезиларли афзалликларга олиб келади.
Tadweer раҳбари 2 декабрь куни Дубайга амалий ташриф билан борган Ўзбекистон президенти Шавкат Мирзиёев томонидан ҳам қабул қилинди.
Маълумот учун: Tadweer БААдаги чиқиндиларни бошқариш бўйича энг йирик давлат компанияси бўлиб, компания веб-сайтида қайд этилганидек, Абу-Дабида даромадларни бошқариш бўйича ягона ташкилот саналади.
