16 ноябрь куни Европарламент ва Европа Иттифоқининг экологик кенгаши экологик жиноятларга қарши кураш бўйича янги директива бўйича келишиб олди, деб хабар берди Европа комиссияси.
Ҳужжатда атроф-муҳитга қарши жиноятлар рўйхатини кенгайтириш ва уларга нисбатан жазо чораларини кучайтириш, шунингдек, экологик жиноятларга аниқроқ таъриф бериш назарда тутилган.
«Янги қонунчилик базаси жиддий экологик ҳуқуқбузарликлар жазосиз қолмаслигини таъминлайди. Бу атроф-муҳитнинг ифлосланиши ва деградациясининг олдини олади ҳамда келажак авлодлар учун табиатимизни асраб-авайлашга хизмат қилади», — дейилади ЕК баёнотида.
Умуман олганда, экологик жиноятлар рўйхати 9 тадан 18 та бандга кенгайтирилди. Ноқонуний дарахт кесиш йўли билан олинган ёғочнинг ноқонуний муомаласи, кема қисмларини ноқонуний утилизация қилиш, кимёвий моддалардан фойдаланиш ва утилизация қилиш қоидаларини бузиш шулар жумласидандир.
Ўлимга олиб келадиган қасддан экологик жиноятлар учун Европа Иттифоқининг барча мамлакатларида шахслар камида 10 йил муддатга озодликдан маҳрум этилиши мумкин. Бошқа қасддан экологик жиноятлар учун жазо 3 йилдан 5 йилгача озодликдан маҳрум қилиш билан белгиланади.
Атроф-муҳитга қарши жиддий жиноятлар содир этган компаниялар глобал товар айланмасининг камида 5 фоизи миқдорида жаримага тортилади ёки 40 миллион евро тўлайди. Камроқ жиддий экологик қоидабузарликлар учун жарима компания умумий айланмасининг 3 фоизини ёки 24 миллион еврони ташкил қилади.
«Экологик жиноятлар атроф-муҳитга, саломатлигимизга, шунингдек, иқтисодиётимизга катта зарар етказади. Жиноятчилар жуда узоқ вақт давомида кучсиз санкциялар ва жазо муқаррар эмаслигидан фойда кўрди», — деди Европа Иттифоқининг атроф-муҳит бўйича комиссари Виржиниюс Цинкевичиус эришилган келишувларни шарҳлар экан.
Энди Европарламент ва ЕИ Кенгаши директивани расман қабул қилиши керак. Шундан сўнг, Европа Иттифоқи мамлакатлари ҳужжатда кўрсатилган нормаларни ўзларининг миллий қонунчилигига киритишлари керак.
