Россияга қарши Европа санкцияларининг 12-пакети 30 дан ортиқ компаниялар, жумладан, Ўзбекистон, Қозоғистон ва Сингапур, шунингдек, Россиянинг бир қанча муҳандислик ташкилотларини ўз ичига олиши мумкин. Европа Иттифоқига аъзо давлатлар шу ҳафта санкцияларни муҳокама қилади. Бу ҳақда Bloomberg хабар берди.
Агентлик маълумотларига кўра, ЕИ Россияга қурол ишлаб чиқаришда қўлланиши мумкин бўлган станоклар ва улар учун эҳтиёт қисмлар экспортини тақиқлашни таклиф қилган. Санкциялар пакети, шунингдек, Россия олмосларини етказиб беришни тақиқлаш ва Россия нефти нархининг юқори чегарасига қўшимча чекловларни ҳам ўз ичига олади (ўтган йилнинг декабрь ойида Ғарб давлатлари уни баррелига 60 доллар қилиб белгилаган).
Таклифлар орасида Россияга кимёвий маҳсулотлар, литийли аккумуляторлар, термостатлар ва двигателлар, жумладан, дронлар учун етказиб беришни тақиқлаш киради. Мамлакатлар суюлтирилган пропан, қуйма темир ва шпигелейзен (темир-марганец қотишмаси), мис сим, алюминий сим, фолга, қувурлар ва арматура импортига чекловларни муҳокама қилади.
Олмосларни олиб киришни тақиқлаш 1 январдан кучга кириши мумкин, параллел равишда учинчи мамлакатларда қайта ишланган рус олмосларини олиб киришга босқичма-босқич билвосита тақиқ жорий этиш режалаштирилмоқда. G7 мамлакатлари (Буюк Британия, Канада, Франция, Германия, Италия, Япония ва АҚШ) ташқи ишлар вазирлари ўтган ҳафта Россия олмосларига чекловлар бўйича келишувга эриша олмади, деб таъкидлайди Bloomberg.
Санкциялар пакети лойиҳаси, шунингдек, россияликларга крипто-активлар учун ҳамёнлар, ҳисоблар ва сақлаш хизматларини тақдим этувчи Европа компанияларида лавозимларни эгаллашни тақиқлашни, Европадаги россияликлар ёки россиялик юридик шахсларга тегишли бўлган ёки назорат қилувчи компаниялардан Европа Иттифоқи ва бошқа мамлакатлардан маблағ ўтказиш учун рухсат сўрашни талаб қилишни ўз ичига олади.
Экспортчилардан шартномаларига Россиядан айрим товарларни реэкспорт қилишни тақиқловчи қоидаларни киритиш талаб қилиниши мумкин.
