АҚШ ҳисоб-китобларига кўра, Россия билан урушда 70 минг Украина аскари ҳалок бўлган, яна 120 минг нафари яраланган. Бу ҳақда «Медуза» Британиянинг The Economist нашрига таяниб хабар бермоқда.
АҚШ расмийлари Украина Қуролли кучларининг Россия билан урушда йўқотишларини тахминан 190 минг аскарга баҳоламоқда. Нашр бу маълумотлар манбасига аниқлик киритмаган. Украина Қуролли кучларининг йўқотишлари хусусида ушбу мамлакат меҳнат бозоридаги ўзгаришларга бағишланган мақолада сўз борган.
Украинада 4,8 миллионга яқин одам Россия ҳужуми бошланишидан кўп ўтмай ишсиз қолган. 2023 йил октябрь ойида мамлакатдаги ишсизлик даражаси 2022 йил баҳоридаги 30 фоиздан 18,4 фоизгача тушди, бироқ урушдан олдинги даражадан сезиларли юқорилигича қолмоқда, деб ёзади The Economist.
«Бир тадқиқотга кўра, украиналик ишчиларнинг 17 фоизи уруш бошланганидан сўнг ўз касбини ўзгартирган. Юз минглаб одамлар армияга чақирилган», — дейилади мақолада. Шунингдек, ишлаб чиқариш, қурилиш ва тоғ-кон саноатида кўпроқ хотин-қизларнинг меҳнатга кириб келаётгани қайд этилган.
Август ойида Американинг The New York Times газетаси бир ярим йил давомида Россия ва Украина қўшинларининг умумий йўқотишлари 500 минг кишига яқинлашганини хабар қилганди. Ўшанда Россия урушда 300 мингга яқин аскар йўқотгани, жумладан, улардан 120 минг нафари ҳалок бўлгани ва 180 минг нафари яралангани айтилган. Украина армиясида эса ҳалок бўлганлар 70 минг кишини, ярадорлар 120 минг ҳарбийни ташкил этгани кўрсатилган.
Аммо Украина Миллий хавфсизлик кенгаши котиби Алексей Данилов бу баҳолаш ҳақиқатга тўғри келмаслиги, рақамлар бўрттириб кўрсатилганини билдирган. «Йўқотишлар ҳақида гап кетганда, бу ҳақиқат эмас. Бизнинг бундай [кўп сонли] армиямиз йўқ», — деган Данилов.
Июль ойида «Медуза» ва «Медиазона» Украинадаги урушнинг бир ярим йил давомида Россия армиясининг йўқотишлари бўйича қўшма тадқиқотини эълон қилганди. Статистик маълумотларга асосланган ҳисоб-китобларга кўра, 2022 йил 24 февралдан 2023 йил май ойининг охиригача Украинада 47 минг россиялик ҳарбий ҳалок бўлган.
