Иқтисодиёт ва молия вазирлиги 2024 йилдан бошлаб ер қаъридан фойдаланганлик учун цемент ишлаб чиқаришга мўлжалланган оҳактош бўйича белгиланган 1 тонна учун 22 минг 500 сўмлик солиқ ставкасини 11 минг 250 сўмгача пасайтиришни таклиф қилмоқда. Мазкур таклиф бўйича 2024−2026 йиллар бўйича бюджетномада маълумот берилган.
Шунингдек, цемент ишлаб чиқариш учун фақат кўмирдан фойдаланувчи заводлар учун белгиланган камайтирилган солиқ ставкалари бекор қилинмоқда.
Бундан ташқари, ер қаъридан фойдаланганлик учун солиқ бўйича алоҳида турдаги, қатъий белгиланган солиқ ставкалари (цемент ишлаб чиқариш учун мўлжалланган оҳактошдан ташқари) 12 фоизга индексация қилинмоқда.
«Газета.uz» бу таклиф нима учун кераклиги ва бюджетга тушумларни қанчага камайтириши кутилаётгани юзасидан Иқтисодиёт ва молия вазирилигидан изоҳ сўради. Вазирликнинг қайд этишича, бу тадбиркорлик субъектлари учун тариф нархлари ошгани натижасида цемент маҳсулотлари таннархи кескин ошиб кетишини олдини олиш ва шу орқали маҳаллий ишлаб чиқарувчиларнинг маҳсулотларини рақобатбардошлигини ошириш мақсадида таклиф этилмоқда.
Оҳактош цемент ишлаб чиқариш учун асосий хомашё ҳисобланади ва бу чора маҳаллий корхоналар учун цемент таннархини тушуриши кутилмоқда.
«Цемент хом ашёси учун ер қаъридан фойдаланганлик учун солиқ ставкаларини унификация қилиш солиқни ҳисоблаш тартибини ва солиқ маъмурчилигини соддалаштиради. Оҳак ишлаб чиқариш учун оҳактошга ҳам ер қаъридан фойдаланганлик учун солиқ ставкаси 5 фоиз миқдорида белгиланган. Халқаро амалиётда оҳактош бўйича ер қаъридан фойдаланганлик учун солиқ ставкалари 3−6 фоиз орасида ўзгариб туради (Қирғизистон, Тожикистон, Россия, Украина), Беларусияда эса 1 тонна учун 0,1664 беларус рубли (ёки 803 сўм) миқдорида қатъий белгиланган ставка мавжуд», — дейилади вазирлик изоҳида.
Солиқ ставкасининг пасайтирилиши бюджетга тушумларни 160 млрд сўм камроқ бўлишига олиб келиши прогноз қилинмоқда.
Эслатиб ўтамиз, аввалроқ Ўзбекистонга цемент, фанера, қолип ва бошқа қурилиш материалларини олиб кириш 2025 йилгача божхона тўловларидан озод қилинганди.
