«Дунёда ишонч йўқолиб, рақобат кучайиб кетяпти. Ҳар бир давлат ўзининг эртанги куни учун курашяпти». Ушбу сўзларни Ўзбекистон президенти Шавкат Мирзиёев 25 октябрь куни Қашқадарё фаоллари билан учрашувда айтиб ўтди. Унинг тўлиқ нутқи «Ўзбекистон24» телеканалининг «Менимча» кўрсатуви орқали намойиш этилди.
«Агар бу курашда биз маррани баланд олмасак, анча орқада қолиб кетамиз. Кечаги кунимизни унутмасдан, эртанги кунимизга тўғри замин яратишимиз керак. Биз бир оила, бир жамият бўлиб шундай ҳаракат қилишимиз керакки, жонажон ватанимиз Ўзбекистонимиз ўзгариши керак», — дея таъкидлади президент.
Шу билан бирга давлат раҳбари ҳозир Ўзбкистон миллий сиёсатини жойига қўйиш масаласида илдам ҳаракат қилаётганини қайд этди.
«Ҳозир очиқлик сиёсатида яшаяпмиз. Ўзимизнинг миллий сиёсатимизни жойига қўйиш — бу азоб. Биз агар ўзимизга мустаҳкам ва мустақил бўлмасак, бизни уёққа ҳам, буёққа ҳам тортиб кетадиган кучлар жуда кўп. Нима учун мен ҳамма соҳада кўпроқ мустақил бўлишга ҳаракат қиламан? Биз қанча кўп мустақил, иқтисодимиз қанча мустаҳкам бўлса, биз билан ҳисоблашишларига мажбур қиламиз. Нимамиз билан? Фақат меҳнатимиз билан. Битта бойлигимиз бор — меҳнатимиз. Агар ҳар биримиз лавозимимиз ва бугунги шароитга муносиб бўлиб меҳнат қилмас эканмиз, биз анча нарсадан ютқазамиз ва анча нарсадан орқада қолиб кетамиз», — деди Шавкат Мирзиёев.
Видеодан лавҳа.
Президент соҳаларда илмни ривожлантириш мамлакатга катта фойда келитиришига ишонч билдирди. Қолаверса, у ҳозир тинчлик, осойишталик тақдирини мудофаа эмас, ақл, билим ҳал қилаётганини таъкидлади.
«Агар биз 10 йил ҳамма соҳада илмни ривожлантирсак, Ўзбекистон ўзгаришига мен ишонаман. Худо хоҳласа 10−15 йил тинчлик бўлса, Ўзбекистон қандай марраларга эришиши мумкинлигини мен тасаввур қиламан. Авваламбор, ҳаммамиз мана шу юртимиздаги тинчлик ва осойишталик, одамларимизга яратилаётган имкониятлар — бу кунларнинг қадрига етишимиз керак. Битта нарсани ўзларинг учун хулоса қилинглар, шу оилаларингни тинчлиги учун ҳам биз мустаҳкам ишлашимиз керак. Мен ҳар сафар оддий бир мисолни айтаман: Энг кичкина неварамиз бизнинг ёшимизга киргунча тинчликни таъминлаб беришимиз керак. Лекин, бу тинчлик, осойишталик тақдирини мудофаа эмас, ақл, билим ҳал қиляпти», — деди Шавкат Мирзиёев.
