Туркия президенти Режеп Таййип Эрдоған 23 октябрь куни Швециянинг НАТОга аъзо бўлиши ҳақидаги протоколни имзолади ва тасдиқлаш учун Туркия парламентига юборди. Бу ҳақда мамлакат раҳбари маъмурияти маълум қилди. Хабарда бошқа тафсилотлар келтирилмаган.
Bloomberg хабарига кўра, Эрдоғаннинг партияси ва иттифоқчилари кўпчилик ўринларга эга бўлган парламентдаги якуний овоз беришдан олдин, Ташқи алоқалар қўмитасида Швециянинг НАТОга аъзолиги муҳокама қилинади. Протоколни ратификация қилиш бўйича овоз бериш қачон бўлиб ўтиши номаълум, дея қайд этади агентлик.
Туркия Швециянинг альянсга киришига охирги рақиблардан бири бўлган, шунинг учун, Bloomberg таъкидлаганидек, Эрдоғаннинг қарори «Россиянинг Украинага бостириб кириши муносабати билан ҳарбий альянс мудофаасини кучайтиришга қаратилган саъй-ҳаракатларидаги катта ютуқ»дир.
Швеция бош вазири Ульф Кристерссон Эрдоғаннинг протоколни имзолашини олқишлади. «Энди парламент бу масалани ҳал қилиши керак», деб ёзди у. «Биз НАТОга аъзо бўлишни интиқлик билан кутамиз».
Швеция ва Финляндия ўтган йилнинг май ойида НАТОга аъзо бўлиш учун ариза топширган. Апрель ойида Финляндия альянсга аъзо бўлди ва Швециянинг иттифоққа киришига эса Стокголмдан бир қанча шартларни бажаришини талаб қилган Туркия томонидан тўсиқ қўйилди.
Швециянинг НАТОга қабул қилиниши ҳақидаги келишув Венгрия томонидан ҳам ҳали ратификация қилинмаган.
НАТО қоидаларига кўра, янги давлатлар иттифоққа унинг барча аъзолари розилиги билангина аъзо бўлиши мумкин. Бугунги кунда иттифоққа 30 та давлат аъзо.
