«Док-1 Макс» сиропи бўйича бўлиб ўтаётган суднинг навбатдаги мажлисида ўзбекистонлик амалдорлар ҳиндистонлик яна бир ишлаб чиқарувчининг 11 та дори воситасини қайта рўйхатдан ўтказиш учун 88 минг доллар талаб қилиб, олдиндан 50 минг доллар олгани маълум қилинди. Бу ҳақда судда гувоҳлардан бири айтиб берди, дея хабар берди «Дарё».
Гувоҳнинг маълумот беришича, у пул масаласида «Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУК раҳбари ўринбосари Н.М. билан мулоқот қилган.
Унинг қўшимча қилишича, сўралган 88 минг долларнинг 50 минг доллари мансабдорнинг ёрдамчиси орқали иш бошидан олинган. Қолган миқдори эса иш битганидан кейин олиниши ҳақида келишилган. Бироқ, «Док-1 Макс» машмашалари бошланиб қолгани боис, 11 та дорини рўйхтадан ўтказиш тўхтаб қолган ва ваъда бажарилмаган. Олинган пул эса қайтариб берилган.
Гувоҳнинг таъкидлашича, у дориларни қайта рўйхатдан ўтказиш учун давлатга тўланиши лозим бўлган ҳар бир дори учун 15 миллион сўмдан — 165 миллион сўм пулни ҳам тўлаган.
Аввалги судларда сўроқ қилинган Quramax Medical МЧЖ директори ҳиндистонлик С.Р.П. адвокатларнинг саволига жавоб берар экан, Marion Biotech PVT. Ltd корхонасида инспекцион текширув ўтказилишини тўхтатиш учун Ж.Э. исмли масъулга 33 минг доллар берганини тан олганди. Кейинчалик у бу кўрсатмасини ўзгартирган.
Суднинг 15 сентябрдаги мажлисида сўроқ қилинган «Дори воситалари, тиббий буюмлар ва тиббий техника экспертизаси ва стандартлаштириш давлат маркази» ДУК рўйхатдан ўтказиш бўлими бошлиғи Ш. Ш. унга берилгани айтилган 33 минг доллар пулни олганини рад этган.
«Газета.uz» Marion Biotech антибактериал препаратлари «Кураракс 200», «Кураракс 400» ва «Кураракс Орни» 2022 йил 25 май (марказ илмий кенгаши йиғилишидан бир кун олдин) ва 19 июлда рўйхатдан ўтганини аниқлаган эди.
