Ҳиндистоннинг Marion Biotech компанияси томонидан ишлаб чиқарилган ва Ўзбекистонда рўйхатдан ўтказилган барча турдаги дори воситаларининг савдоси вақтинчалик тўхтатилди. Бу ҳақда АОКАда Фармацевтика тармоғини ривожлантириш агентлиги ахборот хизмати раҳбари Қизлархон Бегматова маълум қилди.
Унинг қайд этишича, «Док-1 Макс» дори воситасининг савдоси 2022 йил 22 декабрдан вақтинча тўхтатилган бўлиб, «QURAMAX MEDIKAL» МЧЖга реализация қилинган дорихоналардаги қолдиқ дори воситаларини қайтариб олиш ҳамда дорихоналарга мазкур дори воситасини етказиб берувчи дистрибьюторга зудлик билан қайтариш чораларини кўриш бўйича тегишли кўрсатма берилган. Ҳамда ушбу дори воситалари республикадаги барча дорихоналардан тезкорлик билан йиғиб олинган.
Бегматованинг таъкидлашича, 30 декабрдан Ҳиндистоннинг Marion Biotech компанияси томонидан ишлаб чиқарилган ва Ўзбекистонда рўйхатдан ўтказилган барча турдаги дори воситаларининг савдоси вақтинчалик тўхтатилди.
«Marion Biotech компанияси томонидан ишлаб чиқарилган „Док-1 Макс“ дори воситаси таркибида қўшимча ёт моддалар аниқланганлиги боис, ҳозирда ушбу ишлаб чиқарувчининг бошқа маҳсулотларида ҳам ҳам худди шундай ҳолат кузатилиш эҳтимолини инобатга олган ҳолда, компаниянинг бошқа маҳсулотлари ҳам чуқур лаборатор текширувларидан ўтказилмоқда», — деди у.
Соғлиқни сақлаш вазирлиги ҳузуридаги Фармацевтика тармоғини ривожлантириш агентлиги дори воситалари савдоси билан шуғулланувчи улгуржи ташкилотлардан Ҳиндистоннинг Marion Biotech компанияси томонидан ишлаб чиқарилган «Амбронол» йўтал сиропини қайтариб олишни сўради. Бу ҳақда агентлик раҳбари Сардор Қориевнинг 29 декабрдаги хатида айтилади. Хатнинг ҳақиқийлигини «Газета.uz»га давлат органи тасдиқлади.
Агентлик ҳузуридаги Дори воситалари, тиббий буюмлар ва тиббий техникасини экспертизаси ва стандартлаштириш давлат маркази маълумотларига кўра, Ўзбекистон ҳудудига олиб кирилаётган ва муомалада бўлган AABZ2204 серияли «Амбронол» сиропи (15 мг/5 мл, 100 мл) «норматив ҳужжатлар талабларига жавоб бермаслиги» аниқланган.
Вазирлар Маҳкамасининг 2017 йил 18 декабрдаги қарорига асосан Фармацевтика агентлиги дори воситалари ва тиббиёт буюмларининг зарарли таъсири аниқлангандан кейин уларни ишлаб чиқариш, тайёрлаш, олиб кириш ва сотишни белгиланган тартибда тўхтатиб туришни таъминлайди.
Шу муносабат билан агентлик улгуржи фармацевтика ташкилотларидан дори воситаларини сотишни тўхтатишни, уни дорихоналардан қайтариб олиш чораларини кўришни, дорихоналардан эса «Амбронол»ни зудлик билан дистрибютор-етказиб берувчига қайтариб беришни ва кўрилган чора-тадбирлар тўғрисида бир кун муддатда ҳисобот беришни сўраган.
Эслатиб ўтамиз, Ҳиндистон ҳукумати «Док-1 Макс» дори воситасини ишлаб чиқарган Marion Biotech компаниясига қарши суриштирув бошлаганди. Суриштирув Уттар-Прадеш штатидаги Наркотикларни лицензиялаш ва назорат қилиш бошқармаси томонидан олиб борилаяпти.
