Ўзбекистоннинг Польшадаги элчиси Баҳром Бабаев дипломатик миссиясини якунламоқда, дея хабар берди «Дунё»АА.
Шу муносабат билан у Польшанинг Eurogospodarka нашрига интервью берган. Дипломат Ўзбекистоннинг Польша билан ҳамкорлигининг асосий йўналишлари сифатида савдо, инвестиция ва иқтисодий ҳамкорлик, юқори технологиялар трансфери, фан, техника, қишлоқ хўжалиги, таълим, экология, соғлиқни сақлаш ва маданият соҳаларидаги ўзаро ҳамкорлик, шунингдек, минтақавий хавфсизликни мустаҳкамлаш белгиланганини таъкидлади.
«Польша Ўзбекистоннинг етакчи савдо-иқтисодий ҳамкорларидан бири. Логистика имкониятларини чеклаш билан боғлиқ муайян қийинчиликларга қарамай, 2022 йилда икки томонлама товар айирбошлаш биринчи марта 352 млн долларга етди, шу жумладан Ўзбекистондан Польшага экспорт ҳажми 131,1 млн долларни ташкил этди. Польша Европа Иттифоқи мамлакатлари орасида Ўзбекистондан маҳсулот импорт қилиш бўйича икки йил давомида етакчилик қилмоқда», — деди Баҳром Бабаев.
Бугунги кунда Ўзбекистон бозорида бир қатор етакчи Польша компаниялари Adamed Group (соғлиқни сақлаш), Codepharm (фармацевтика), Dressta Liugong (оғир қурилиш техникаси ишлаб чиқариш), Lenartt (транспорт/логистика), LUG Light Factory (энергетика), LUG Light Factory (қурилиш кимёси) фаолият кўрсатмоқда.
Элчининг сўзларига кўра, яқин келажакда Польшанинг Transforwarding International (транспорт/логистика), Pronar (қишлоқ хўжалиги машиналари ишлаб чиқариш), Seneka Poland (балиқ етиштириш), KGHM (мис ишлаб чиқариш ва қайта ишлаш) ва бошқалар ўз капиталларини инвестиция қилиш ниятида.
Дипломат университетлар, илмий ва маданий муассасалар ўртасидаги алоқаларнинг кенгайишини, шунингдек, шаҳарлар ва минтақалар ўртасидаги имтиёзли муносабатларни қайд этди. Хусусан, ҳозирги кунда еттита ўзбек ва Польша олий ўқув юртлари ўртасида келишувлар мавжудлиги, Польшанинг турли шаҳарларида эса 5000 дан ортиқ ўзбек талабалари таҳсил олаётгани қайд этилди.
«Бугун Ўзбекистонда 30 дан ортиқ етакчи хорижий университетлар, жумладан, Андижонда 3 йилдан бери фаолият юритиб келаётган Варшава менежмент университети ўз филиалларини очди. Айни пайтда биз Тошкентда ижтимоий ва иқтисодий университетнинг филиалини очиш устида ишлаяпмиз», — деди элчи.
2023 йилнинг 9 ойида мамлакатга 5000 дан ортиқ Польша фуқаролари ташриф буюришди. Uzbekistan Airways ва LOT Polish Airlines авиакомпаниялари 2024 йил 23 февралдан бошлаб «Варшава-Тошкент-Варшава» тўғридан-тўғри авиаташувини ишга тушириш тўғрисида келишувга эришдилар.
Дипломатнинг таъкидлашича, у Польшада дипломатик ваколатхона раҳбари сифатида саккиз йил ишлаган. Мамлакат ҳақида бой тажриба ва билимларга эга, энг муҳими, қўллаб — қувватлаши ва ёрдами доимо сезилиб турадиган кўплаб дўстлар орттирган.
«Йиллар давомида жуда кўп ишлар қилинди, олдинда икки томонлама кун тартибининг аниқ йўналишлари бўйича катта ишлар давом этмоқда. Бизнинг мақсадимиз — Ўзбекистон ва Польша ўртасида турли хил сиёсий, иқтисодий, ижтимоий ва хавфсизлик масалалари бўйича чуқур мулоқот ва амалий ҳамкорликни амалга ошириш», — дея хулоса қилди элчи.
Баҳром Бабаев 2015 йилдан бошлаб дипломатик миссияни Польшада Ўзбекистон ишларида вақтинчалик вакил сифатида ва 2019 йил май ойидан элчи сифатида давом эттирган.
