Қозоғистон урушда ишлатилиши эҳтимоли бўлган 106 турдаги товарнинг Россияга экспортига тақиқ қўйди, дея хабар берди «КазТАГ» агентлиги. Маълумотларига кўра, хусусан, дронлар, электрочиплар ва микроэлектроника экспорти тақиқланган.
«Биз уруш билан боғлиқ бўлган товарлардан ташқари барча товарларни экспорт қиламиз, уларга [урушга боғлиқ товарларга] чеклов қўйилган. Бу 106 турдаги товарлар — биз уларни экспорт қилишни бутунлай тақиқладик», — дея Қозоғистон савдо ва интеграция вазири ўринбосари Кайрат Торебаев сўзларидан иқтибос келтирган агентлик.
Унинг тушунтиришича, бу турдаги маҳсулотларнинг барчаси Қозоғистонда ишлаб чиқарилмайди ва Россия Украинага бостириб киришидан олдин Қозоғистон орқали реэкспорт қилинган. «Қозоғистон [бу товарларни] импорт қилади, лекин экспорт қилмайди. Улар нафақат Ғарбда, балки бошқа мамлакатларда ҳам [ишлаб чиқарилган]», — дея қўшимча қилди Тўребаев.
Украина президенти офиси раҳбари Андрей Ермак жорий этилган чекловларга муносабат билдирди.
«Душман реэкспорт орқали Ғарб компонентларини олишга ҳаракат қилди. Макфол-Ермак гуруҳи ҳамкорларимиз билан россияликлар учинчи давлатлар орқали қурол ишлаб чиқариш учун муҳим бўлган компонентларни янада кўпроқ ололмаслигини таъминлаш мақсадида ишлади».
Маълумот ўрнида, Макфол-Ермак гуруҳи халқаро экспертлар гуруҳи ҳисобланиб, Россия ва Беларусга нисбатан санкциялар сиёсати бўйича тавсиялар ишлаб чиқиш билан шуғулланади. У Владимир Зеленский ташаббуси билан яратилган бўлиб, унинг ишига Украина президенти офиси раҳбари Андрей Ермак ва АҚШнинг Россиядаги собиқ элчиси Майкл Макфол раҳбарлик қилади.
Аввалроқ The Bell санкциялар остидаги Россия қўшни давлатлар, жумладан, Ўзбекистондан товарлар импортини салкам 40 фоизга оширгани ҳақида ёзганди. Бунга параллель тарзда Европанинг минтақага экспорти, айниқса, микроэлектроника, транспорт ускуналари, компьютер ва бошқа электрон ускуналар экспорти ўсган.
