АҚШ президенти Жо Байден Американинг CBS телеканалига берган интервьюсида Фаластиннинг ҲАМАС гуруҳи бутунлай йўқ қилиниши кераклигини, бироқ Ғазо секторининг Исроил томонидан босиб олинишига қарши эканини айтди.
Суҳбат давомида журналист Байдендан Фаластин-Исроил можаросининг ҳозирги босқичида Исроилнинг Ғазо секторини босиб олишини қўллаб-қувватлайсизми, деб сўради.
«Бу катта хато бўларди. Ғазода содир бўлган воқеалар, назаримда, ҲАМАС билан боғлиқ ва ҲАМАС радикаллари бутун Фаластин халқини ифодаламайди. Ва, менимча, Исроил учун яна Ғазони босиб олиш хато бўлади. Аммо ичкарига кириб, экстремистларни қўлга олиш керак…», -деб жавоб берди АҚШ президенти.
Байден ҲАМАСни бутунлай йўқ қилиш керак деб ҳисоблайдими, деган аниқлаштирувчи саволга у ижобий жавоб берди.
«Ҳа, шундай деб ўйлайман. Лекин Фаластин ҳокимияти бўлиши керак. Фаластин давлатининг мавжуд бўлиши учун йўл бўлиши керак», — деди у ва гап икки давлат бўлишини кўзда тутувчи ечим ҳақида кетаётганига ойдинлик киритди.
«Исроил Холокост каби жиддий оқибатларга олиб келадиган варварликка алоқадор бир гуруҳ одамларни таъқиб қилмоқда. Ва шунинг учун мен Исроил жавоб бериши кераклигига ишонаман… ҲАМАС — бир тўда қўрқоқлар. Улар тинч аҳоли ортига яширинган», — дея қўшимча қилди АҚШ президенти.
Шу билан бирга, Байден Исроил уруш қоидаларига амал қилишига ишонч билдирди. Шунингдек, унинг маъмурияти ҳозирда Исроил ва Миср ҳукумати билан Ғазодан тинч аҳолини олиб чиқиш учун гуманитар йўлак ташкил этиш бўйича музокаралар олиб бораётганини билдирди.
Байденнинг баёнотларига жавобан Исроилнинг БМТдаги элчиси Гилад Эрдан, Исроил Ғазони босиб олишдан манфаатдор эмаслигини таъкидлади.
«Ғазони босиб олишдан ёки Ғазода қолишдан манфаатдор эмасмиз, лекин биз омон қолиш учун курашаётганимиз сабабли ва президент Байденнинг ўзи таъкидлаганидек, ягона йўл — ҲАМАСни йўқ қилиш, биз уларнинг куч ва маблағларини йўқ қилиш учун ҳамма нарсани қилишимиз керак», — дея таъкидлади Исроил элчиси CNN телеканалида.
Исроилнинг АҚШдаги элчиси Майкл Герцог ҳам CNN телеканалига унинг мамлакати можаро тугаганидан кейин Ғазо секторини босиб олиш нияти йўқлигини ва «икки миллиондан ортиқ фаластинликларнинг ҳаётини бошқаришни истамаслигини» айтди.
Исроил ва Ғазо секторини назорат қилаётган ҲАМАС гуруҳи ўртасидаги жанглар бир ҳафтадан ортиқ вақтдан буён давом этмоқда. Можаро 7 октябрь куни ҲАМАС жангарилари Исроил ҳудудига минглаб ракеталарни отиб, мамлакатнинг чегара ҳудудларига бостириб кириши билан яна авж олди. Охирги маълумотларга кўра, 1400 дан ортиқ киши, жумладан, хориж фуқаролари ҳужум қурбони бўлган, 200 га яқин одам эса гаровга олинган.
Исроил бунга жавобан Ғазо секторига ҳаво ҳужумлари уюштирди ва мамлакат расмийлари ҲАМАСга қарши расман уруш эълон қилди. Фаластин Соғлиқни сақлаш вазирлиги маълумотларига кўра, бомбалар портлаши оқибатида анклавда 2670 киши ҳалок бўлган, яна 9600 киши жароҳатланган.
9 октябрдан бери Ғазо сектори Исроил томонидан тўлиқ блокадада. У ерда озиқ-овқат, газ ва энергия етказиб бериш тўхтатилган. Исроил расмийлари ҲАМАС гаровга олинганларни озод қилмагунча блокада тугамаслигини маълум қилди.
14 октябрь куни Исроил мудофаа кучлари Ғазо секторида қуруқликдаги операцияни бошлашга тайёрланаётганини билдирди. Операциядан мақсад Ғазо шаҳрини қўлга киритиш ва ҲАМАСнинг олий сиёсий ва ҳарбий раҳбариятини йўқ қилишдир, деб ёзди The New York Times.
Босқиндан олдин Исроил ҳарбийлари ғазоликларни жанубий ҳудудга эвакуация қилишга чақирди ва бунинг учун уларга 24 соат вақт берди. Исроил армияси маълумотларига кўра, 15 октябргача ярим миллионга яқин одам шимолий секторни тарк этган.
БМТ бош котиби Антониу Гутерриш Исроил ҳукуматига Ғазо секторига инсонпарварлик ёрдамини киритиш, ҲАМАСдан эса анклавдаги гаровга олинганларни озод этиш талаби билан мурожаат қилди.
