Ижтимоий тармоқларда Ўзбекистон Миллий университети проректори ва мурожаатчи аёл ўртасидаги тортишув акс этган видео тарқалди. Видеода проректор аёл билан сенсираб гаплашгани, уни «ифлос» деб атаб, «Йўқол бу ердан «вообше», дегани акс этган. Аёл ундан тинчланишни сўраб, «олий таълимда» турганини эслатади.
Университет ҳолатга муносабат билдириб, ҳолат 2023 йил сентябрь ойи биринчи ўн кунлигида рўй берганини маълум қилди.
Қайд этилишича, мурожаатчи аёл проректор қабулига кирган. Қизи геология факультети 1-курси кечки бўлимга ўқишга кирганини айтиб, «талабалар турар жойидан ўрин ажратиш ва иш билан таъминлашни талаб қилган». Проректор мурожаатчига кечки таълим шаклида таҳсил оладиган талабалар учун ётоқхона етишмаслиги, ўринлар кундузги таълим шаклида ўқийдиган талабаларни қамраб олганини билдирган.
«Мурожаатчи тушунишни хоҳламай, у ҳолда иш билан таъминлаб берасизлар, деб талаб қўйган. Проректор агар имконият топсак, мактаблардан иш гаплашиб берамиз, деб керакли тавсияларни берган. Аёл эса фарзандига университетдан иш ҳал қилиб бериш талабини қўйган. Талаблари тўлиқ қаноатлантирилмаган аёл кетар чоғида университет раҳбарияти ва проректорни ўринсиз ҳақоратлаб кетган. Куракда турмайдиган сўзлар проректорнинг нафсониятига теккан ва у ҳам аёлга нисбатан қўпол сўзларни ишлатган», — дейилади университет муносабатида.
Таъкидланишича, шу вазият мурожаатчи томонидан ёзиб олинган ва «проректор мурожаатчи аёлни ҳақорат қилди» деган маънодаги қисми тарқатилган. Университет проректори билан рўй берган ушбу ҳолатда адолатли қарор чиқариш юзасидан тегишли орган томонидан текшириш ишлари олиб борилмоқда.
«Вазият тўлиқ ўрганилиб, ҳолатга ҳуқуқий баҳо берилгунича ҳозирда видеода акс этган проректор ўз вазифасидан вақтинча четлатилди ва унинг вазифалари университетнинг бошқа масъул проректорига юклатилди. Тегишли текширувлардан сўнг проректорга ташкилий, интизомий ёки маъмурий чора кўриш бўйича якуний қарор қабул қилинади», — дейилади хабарда.
