Тошкент метросида сўнгги 15 кунда поезд йўлига тушиш билан боғлиқ 3 та ҳолат аниқланди. Бу ҳақда метрополитен ахборот хизмати хабар қилди.
Поезд йўлига тушган йўловчилар бекатда фаолият олиб борувчи ходимлар томонидан зудлик билан ушбу йўловчилар хавфсиз тарзда платформага олиб чиқилган. Йўловчилар шахсий буюмлари тушиб кетгани ва уни олиш мақсадида поезд йўлига тушганини сабаб қилиб кўрсатган.
Метрополитен таъкидлашича, метро йўлида инсон ҳаёти учун хавфли ҳаттоки ўлим даражасига олиб борувчи юқори кучланишдаги (825 Вольт) электр токи мавжуд. Маълумот ўрнида, 42 Вольт кучланишдаги электр токи инсон ҳаёти учун хавфли ҳисобланади.
«Шу сабабли метродан фойдаланиш вақтида ҳушёр ва сергак бўлинг. Агарда бу каби ҳолатларга дуч келсангиз зудлик билан бекат платформасида фаолият олиб борувчи ходимларга мурожаат қилишингиз лозимлиги эслатиб ўтамиз», — дейилади хабарда.
4 августда Тошкент метрополитенининг «Дўстлик-2» бекатида фуқаро метро йўлига тушиб қолган бош кийимни олиш мақсадида ўзбошимчалик билан поезд йўлига тушгани хабар қилинганди. Унга нисбатан «Метрополитендан фойдаланиш тартиб-қоидалари»га амал қилмагани сабабли баённома расмийлаштирилган.
