4 августда Тошкент метрополитенининг «Дўстлик-2» бекатида фуқаро метро йўлига тушиб қолган бош кийимни олиш мақсадида ўзбошимчалик билан поезд йўлига тушган. Бу ҳақда «Тошкент метрополитени» ахборот хизмати хабар қилди.
Метрополитен ва ички ишлар органи ходимлари томонидан кўрилган чора-тадбирлар орқали йўловчи хавфсиз тарзда платформага чиқарилган.
Фуқаро А.М.га нисбатан «Метрополитендан фойдаланиш тартиб-қоидалари»га амал қилмагани сабабли баённома расмийлаштирилди.
«Шу билан бир қаторда метро йўлида инсон ҳаёти учун хавфли ҳисобланувчи юқори кучланишли электр токи мавжудлигини эслатиб ўтамиз. Шу сабабли метродан фойдаланиш вақтида ҳушёр ва сергак бўлинг. Агарда бу каби ҳолатларга дуч келганингизда зудлик билан бекат платформасида фаолият олиб борувчи ходимларга мурожаат қилишингизни сўраймиз», — дейилади метрополитен хабарида.
