Лотин ёзувига асосланган ўзбек алифбосидаги 4 та ҳарфнинг янги шакли лойиҳаси эълон қилинди. Бу ҳақда ЎзА хабар бермоқда.
Қайд этилишича, Алишер Навоий номидаги Тошкент давлат ўзбек тили ва адабиёти университетида алифбо ислоҳоти бўйича илмий-назарий конференция бўлиб ўтди.
Унда таклиф сифатида ишчи гуруҳ томонидан 28 та ҳарф, 1 та ҳарфлар бирикмаси ва тутуқ белгисидан таркиб топган такомиллаштирилган алифбо лойиҳаси эълон қилинди. Лойиҳа орқали «шу пайтга қадар кўп мураккабликларни юзага келтираётган ҳарфлар ислоҳ қилиниши» таъкидланган.
Бунда
- O‘ o‘ ни Õ õ
- G‘ g‘ ни Ğ ğ
- Sh sh ни Ş ş
- Ch ch ни C c ҳарфига ўзгартириш таклиф этилмоқда.
Таклиф этилаётган янги алифбо. Унда ҳарфлар тартиби ҳам ўзгарганини кўриш мумкин.
Бундан 2 йил муқаддам Давлат тилини ривожлантириш департаменти лотин ёзувидаги ўзбек алифбоси бўйича таклиф этилган ўзгаришлар ўқувчилар саводига ижобий таъсир қилишини ва амалдаги алифбо ўзбек тилининг интернет тилига айланишига тўсиқ бўлаётганини айтганди. «Газета.uz» колумнисти Комил Жалилов эса департамент аргументларининг асосида илмий далилларни кўрмаганини таъкидлаган.
