Ўзбекистон Соғлиқни сақлаш вазирлиги шу кунларда дунёнинг қатор давлатларида коронавируснинг пирола номли янги штами кенг тарқалаётгани, унинг омикрондан ҳам юқумлироқ бўлиши мумкинлиги ҳақида хабар берди.
Қайд этилишича, ҳозиргача мазкур мутация Исроил, Канада, Дания, Буюк Британия, Жанубий Африка, Швеция, Норвегия, Швейцария, Таиланд ва АҚШда рўйхатга олинган.
Пирола илк бор 2023 йилнинг ёз фаслида аниқланган. Шундан сўнг баъзи минтақаларда инфекцияни юқтириш ва ўлим кўрсаткичлари бирмунча кўпайиши қайд этилган, дейилади хабарда.
Ўзбекистон Санитария-эпидемиология қўмитасининг маълум қилишича, ҳозиргача мамлакатда ва қўшни давлатларда коронавируснинг ушбу штами билан касалланганлар қайд этилмаган.
Санэпидқўмитанинг Вирусология илмий-тадқиқот институтида вирус геномини ўрганиш (секвенлаш) бўйича ўтказилган сўнгги таҳлиллар натижасига кўра, мамлакатда касалланганларнинг 100 фоизида омикрон штамининг турли вариантлари экани аниқланган, хулоса қиладиган бўлсак, ҳеч қандай хавотирга ўрин йўқ, дейилади қўмита хабарида.
Мамлакатда эпидемик вазият барқарор дея баҳоланган.
