Ғарбий Африкада жойлашган Нигерия мамлакатида электростанцияда ёнғин юз бериши ортидан барча ҳудудлар электр таъминотидан 10 соатга узилиб қолди, деб хабар бермоқда Al Jazeera. Бу вақт оралиғида 200 миллиондан ортиқ одам электрсиз қолиб кетган.
Авария барча — 36 та штат ва Нигерия пойтахти Абужага таъсир кўрсатди. Мамлакатда электр энергияси ишлаб чиқариш дастлаб нолга тушиб, кейин 237 МВтгача кўтарилди, кунлик ўртача 4100 МВтни ташкил этади.
Нигерия жануби-шарқини электр энергияси билан таъминлайдиган Enugu электр тақсимлаш компанияси ҳодисани «тизимнинг бутунлай ишдан чиқиши» деб атади. Кейинроқ мамлакат энергетика вазири уланишларнинг ярмидан кўпи ишлаётганини, қолганлари эса «имкон қадар тезроқ» тўлиқ тикланишини айтди.
The Guardian миллий газетасининг ёзишича, тизимнинг қулашига миллий электр тармоғига масъул бўлган Transmission Company of Nigeria (TCN) томонидан «нотўғри бошқарув» сабаб бўлган. Нашрнинг таъкидлашича, сўнгги 10 йил ичида TCNга 7,5 миллиард доллардан ортиқ сармоя киритилган, бироқ тизим хусусийлаштиришдан олдинги амалиётлар, коррупция, инфратузилма муаммолари ва бошқа камчиликлардан азият чекишда давом этмоқда.
Нигерия энг йирик нефть ва газ ишлаб чиқарувчиси, аммо мамлакатнинг электр таъминоти беқарор, дея қайд этади Al Jazeera. Мамлакатнинг ўрнатилган қуввати 12,5 минг МВтни ташкил этади, бироқ бу кўрсаткичнинг чорак қисмини ишлаб чиқаради. Энергиянинг асосий қисми иссиқлик ва гидроэлектростанцияларда ишлаб чиқарилади. Нигерия аҳолисининг 50 фоиздан камроғи доимий электр энергиясидан фойдаланиш имкониятига эга, дея аниқлик киритди BBC.
Нигерия электр тармоғи 2022 йилда камида тўрт марта ишдан чиққан. Ўшанда расмийлар бунга сабаб сифатида техник носозликларни кўрсатганди.
