Тошкент шаҳри Мирзо Улуғбек туманида Ascendant group компанияси қурилиш майдонидаги 10 туп дарахтнинг қуриб қолишига сабабчи бўлиб, ўсимлик дунёсига 248 млн 94 минг сўм зарар етказди.
Пойтахт экология бошқармаси хабарига кўра, бошқарма 24 февраль куни ташкилот қурилиш қилаётган ҳудуддаги 30 туп дарахтни хатловдан ўтказган ва уларга зарар етказмаслик ҳақида огоҳлантирган. Бироқ, шунга қарамай, ташкилот қурилиш ишларини олиб бориш жараёнида қонун бузилиши ҳолатига йўл қўйган.
Ҳудудда жами 3 туп ўрик, 2 туп гилос, 1 туп хурмо дарахти ҳамда 3 туп чинор, 1 туп шумтол ўсишдан тўхтайдиган даражада шикастлантирилган.
Ҳолат бўйича тўпланган ҳужжатлар ҳуқуқий баҳо берилиши учун прокуратурага юборилди.
