Россия президенти Владимир Путин Тверь вилоятида бортида 10 киши бўлган Эмбраэр Легасй самолёти ҳалокатида ҳалок бўлган «Вагнер» ХҲК раҳбари Евгений Пригожиннинг оила аъзоларига ҳамдардлик билдирди:
«Барча қурбонларнинг оилаларига самимий ҳамдардлик билдирмоқчиман, бу абадий фожиа», — деди у.
Дастлабки маълумотларга кўра, самолётда «Вагнер» ХҲК ходимлари бўлган, деди Путин. Агар шундай бўлса, «булар Украинадаги неонацистлар режимига қарши кураш бўйича умумий ишимизга катта ҳисса қўшган одамлар», «биз буни эслаймиз, биламиз ва унутмаймиз», деди у.
«Мен Пригожинни жуда узоқ вақтдан бери, 90-йилларнинг бошидан бери биламан. У тақдири мураккаб бўлган, ҳаётда жиддий хатоларга йўл қўйган, керакли натижаларга эришган», деди РФ президенти.
Пригожин «иқтидорли инсон, истеъдодли тадбиркор эди ва нафақат бизнинг мамлакатимизда, балки Африкада натижалар билан ишлаган, у ерда нефть, газ, қимматбаҳо тошлар ва металлар билан шуғулланган», деди Путин.
«Менга маълум бўлишича, у кеча Африкадан қайтган, бу ерда баъзи расмийлар билан учрашган», — дея давом этди Россия президенти.
«Келинг, яқин орада терговчилар нима дейишини кўрамиз. Ҳозир техник ва генетик экспертиза ўтказилмоқда, бу бироз вақт талаб этади», — дея қўшимча қилди у.
«Газета.uz» ҳалокатга учраган самолёт Москвадан Санкт-Петербургга учаётганини ёзган эди. Ҳалокатдан сўнг дарҳол Росавиация йўловчилар рўйхатида Евгений Пригожиннинг ҳам исми борлигини маълум қилди.
