Ўзбекистон президент Шавкат Мирзиёев Будапештдаги амалий ташрифи доирасида Венгрия бош вазири Виктор Орбандан ташқари яна бир қанча давлат раҳбарлари билан учрашди, дея хабар қилди давлат раҳбари матбуот хизмати.
Хусусан, Шавкат Мирзиёев ва Туркия президенти Режеп Таййип Эрдоғаннинг 20 август куни бўлиб ўтган учрашувида икки давлат ўртасидаги стратегик муносабатларни мустаҳкамлаш масалалари, икки ва кўп томонлама тадбирлар режаси кўриб чиқилди. Қўшма стратегик ҳамкорлик кенгашининг навбатдаги йиғилиши, Туркий давлатлар ташкилоти ва Иқтисодий ҳамкорлик ташкилотининг жорий йилда ўтказилиши мўлжалланган саммитлари шулар жумласидандир.
Президентлар ўзаро савдо кўрсаткичлари ўсиб бораётгани ва 1 июлдан Имтиёзли савдо тўғрисидаги битим кучга кирганини таъкидлади.
Енгил атлетика бўйича жаҳон чемпионати доирасида Шавкат Мирзиёев Қатар амири Тамим бин Ҳамад Ол Соний, Озарбайжон президенти Илҳом Алиев, Қирғизистон президенти Садир Жапаров, Туркманистон президенти Сердар Бердимуҳамедов, Сербия президенти Александр Вучич ва Татаристон раиси Рустам Минниханов билан ҳам суҳбатлашди.
Етакчилар жаҳон чемпионатининг эркаклар ўртасида 100 метр масофага югуриш бўйича финал баҳсини томоша қилди.
19−27 август кунлари Будапештда енгил атлетика бўйича XIX жаҳон чемпионати бўлиб ўтади. Мусобақада 190 дан ортиқ давлатдан 2000 дан ортиқ спортчи иштирок этмоқда.
Ўзбекистондан 5 нафар атлетчи спортнинг баландликка сакраш, уч хатлаб сакраш, узунликка сакраш, еттикураш ва марафон каби турларида куч синашмоқда.
Ғолиблар ҳамда олимпия нормативларини бажарган спортчилар 2024 йилда Париж шаҳрида бўлиб ўтадиган Олимпия ўйинларида иштирок этиш ҳуқуқини қўлга киритади.
Шавкат Мирзиёев, шунингдек, Будапештда Венгрия давлат байрами — авлиё Иштван куни муносабати билан ўтказилган тадбирларда ҳам иштирок этди.
Бундан ташқари, у яқинда Ўзбекистон бозорига «Ипотека-банк»ни хусусийлаштириш йўли билан кирган ОТР банки бошқаруви раиси Шандор Чанини қабул қилди.
