Ижтимоий тармоқларда эркак қизни олиб қочишда айбланаётгани акс этган видео тарқалди.
Видеода эркакнинг юзида қон оқаётган яра борлиги кўринади. Шунингдек, тасвирларда икки нафар ҳуқуқ-тартибот идораси ходими ғазабланган аҳолини тинчлантиришга ҳаракат қилаётгани, бир аёл эса эркакни қизини олиб қочишга уринганликда айблаётганини кўриш мумкин.
Хоразм вилояти Ички ишлар бошқармаси ҳодиса 14 август куни Урганч шаҳрида содир бўлганини маълум қилди. Қайд этилишича, вояга етмаган қизга тегажоғлик қилишда гумонланган 43 ёшли фуқаро 2006 йилдан буён шизофрения ташхиси билан руҳий-асаб касалликлар диспансерида ҳисобда турган.
Ҳолат Урганч шаҳар ИИБ томонидан ўрганилмоқда, гумонланувчи вилоят руҳий-асаб касалликлар диспансерига жойлаштирилди.
