Наманган шаҳри солиқ инспекцияси бошлиғи ўринбосари ва МЧЖ юристи пора олганликда гумонланиб, ушланди. Бу Бош прокуратура ҳузуридаги департамент ҳамда ДХХ ўтказган тезкор тадбирда маълум бўлди.
Аниқланишича, шаҳар солиқ инспекцияси бошлиғи ўринбосари умумий овқатланиш шохобчасининг ёпиб қўйилган ҳисобрақамини очиб беришни ваъда қилган. Бунинг эвазига у бошқа бир ташкилот юристи орқали тадбиркордан 2000 доллар пора талаб қилган. Юрист ҳам ўз вақтида солиқ инспекциясида фаолият юритган.
Юрист тадбиркордан пулларни олган вақтида ашёвий далиллар билан ушланган.
Мазкур ҳолат юзасидан солиқ инспекцияси бошлиғи ўринбосарига нисбатан Жиноят кодексининг 210-моддаси (Пора олиш) билан жиноят иши қўзғатилди. Юрист эса 28, 210-моддалари (Жиноятда иштирокчилик, Пора олиш) билан терговга жалб қилинган.
